Home Deporte Benjamin Francees a gaña hopi mes pasobra Pony League no ta un...

Benjamin Francees a gaña hopi mes pasobra Pony League no ta un federacion pero un fundacion

1232
0
SHARE
- Advertisement -

ORANJESTAD (AAN): Riba media social a sali cu Pony League no a ricibi ayudo financiero for di gobierno y esaki a crea un polemica, unda cu Minister di Salud Publico, Cuido di Nos Grandinan y Deporte, Carlos “Alex” Schwengle a mustra cu no ta asina cosnan a bay. Pony League a ricibi e ayudo financiero pero unda e placa a bay no por bisa y esey a pone cu nan a haci eventonan pa recauda e fondonan necesario. Na diferente ocasion a pidi pa sinta hunto pa asina por yega na solucion.

E asunto aki a pone cu e situacion a haya rais na un manera negativo pa deporte, pero segun Minister Schwengle esaki no ta asina. Tur e problema aki ta bin door di President di Pony League Benjamin Francees y esaki ta algo di lamenta. Benjamin Francees a gaña hopi mes pasobra Pony League no ta un federacion pero un fundacion y tin un diferencia grandi. Un federacion tin un sistema democratico y den deporte mayoria bes ta haci uzo di federacion, pero tin algun excepcion haci den e mundo di deporte. ASU ta reconoce algun fundacion tambe den e mundo di deporte, entre otro Lifida, Little League, pero ta reconoce federacionnan cual mayoria ta haya subsidio di Comision Subsidio. Esaki ta garantisa cierto democracia di e crecemento di e deporte concerni.

Minister Schwengle a trece padilanti e motibo pakico no mester tin hopi little league, pasobra 1 little league pa Aruba ta bon y loke cu mester haci ta percura pa reenforsa e little league. Mester percura cu little league por funciona bon y no ta desde awo Ministerio di Deporte a pidi Pony League sinta hunto na mesa cu Little League, ABBA y e partnernan ASU, COA y papia pa yega na un solucion. Tur esaki a pasa por ta pa necesidad y no a keda atendi pa Little League y cu a ocasiona cu Pony League a lanta. Tur e cosnan aki cu a bin dilanti por a keda evita y pa por soluciona esaki mester yega na mesa. No tin espacio financiero ni na cantidad di mucha pa tin 2 liga di baseball di mucha y ni pa un di 3. Minister Schwengle ta kere cu na final Aruba mester tin 1 Little League y con nan lo yega na un acuerdo pa cu esaki, e ta stimula tur partido pa sinta hunto na mesa hunto cu ASU pa asina yega na un acuerdo.

No lo haci cambio den e reglanan, unda cu e placa otorga na deporte lo keda bay via Comision Subsidio. E comision aki lo bira Stichting Sport Subsidie Aruba entrante 1 di Januari 2018 y pa sigui haya e subsidio esaki lo bay segun un reglamento. Esaki ta pa tin disciplina y pa no tin abuso manera a pasa pa durante añanan largo. Den diferente federacion ta pasa cu un ta haya mas cu otro y e mesun ta keda biaha y un ehempel ta softball, unda cu e federacion ta haya un tiki placa pa softball pero cierto clubnan ta haya hopi placa y ta bay afo pa hunga weganan di fogeo. Esaki ta weganan cu no ta registra oficialmente na e pais. Ministerio di Deporte kier evita cu cosnan aki sigui sosode di cual tin un regla y disciplina. Ta otorga un federacion e subsidio cu nan ta pidi pe na momento cu nan ta cumpli cu e reglanan y tambe mester cumpli cu nan palabra. Tambe e federacion nan mester por demostra kico nan ta haci cu e placa. Esaki ta un bon manera pa ta transparente den e maneho y cu nan ta cumpli cu e reglanan, pero tambe cu nan ta demostra unda e placa ta bay pasobra na final e placa ta bin di pueblo. Minister Schwengle hunto cu e partnernan, esta COA, ASU, Fundacion Lotto pa Deporte y Comision Subsidio ta uni riba igualdad den deporte.

E forma con e asunto di Pony League a bin dilanti y con e president ta actuando, e ta manipulando hende. E ta un persona cu tin un maneho na un forma hopi dudoso y lagando yen di debe tur caminda y ta gaña no solamente mayornan pero mucha tambe. A tarda pa trece dilanti kico ta pasando pero esaki tabatin su motibonan. Awo cu a bin afo cu tur esaki, lo percura cu awo padilanti e cifranan di Comision Subsidio keda publica anualmente. Aki lo publica kende a haya placa y cuanto nan a haya. Na momento cu Stichting Sport Subsidie Aruba cuminsa funciona otro aña, lo publica tambe e cumplimento cu e reglanan, kiermen lo publico esnan cu si a cumpli y esnan cu no a cumpli. E idea ta pa pueblo haya sa con e federacion nan ta manehando e placa cu ta bin di pueblo. Esaki ta pa evita cu sigui bisa cu ta minister ta esun cu ta haci mal uso di e placa cual no ta asina.

- Advertisement -

DUNA COMENTARIO

Please enter your comment!
Please enter your name here