Home Comentario Cambio di mentalidad y eleccion

Cambio di mentalidad y eleccion

14
0
SHARE
- Advertisement -

Remitido

Atrobe e letania di propaganda politico aki aya. Dornamento di vehiculonan cu stickernan cu por cierto ta costa hopi placa. Competencia di kende tin e bandera mas grandi atrobe cu ta costa hopi pa no menciona mes e tantisimo borchi ,y banderanan na cas, flanelnan etc, etc. Tur esaki no ta necesario y e placa aki por ser usa pa hopi causa caritativo.

Ki dia nos hendenan ta madura y stop cu e comportacion infantil y atrasa aki ? Bo por pone cuanto sticker cu bo kier riba bo vehiculo y bo por traha banderanan grandisimo pero ta un biaha so bo por vota.

A bira tempo cu nos mester stop cu e payasadanan aki y crece y madura y compronde cu eleccion ta un asunto serio y no ta pa hasi fiesta y carnaval di dje. No tin ningun necesidad pa pone ningun bandera politico na bo cas y expone bo mes ya cu voto ta sagrado y loke ta mas importante E TA SECRETO. Dia cu nos stop cu e comportacion aki cos lo por drecha y posibelmente no ta bay tin mester di mucho capital mas pa financia campaña y consecuentemente no lo bay tin espacio pa capitalistanan inverti den campaña y consecuentemente dicta pa gobernantenan.

Ta nos mes ta culpable cu tin tanto corupcion door di haci posibel cu nan por inverti door cu nos ta haci mucho propaganda y trece gasto. Ki dia nos ta bira mas conciente y madura.

Un sticker na bo auto no ta suficiente ? Ya caba tin un indicacion cua partido lo hiba un campaña miyonario y ta un secreto publico ta kende e bigfish sponsor ta ya cu mitad di Aruba ta di nan caba.

Un Aruba di 5 strea mester por tin un campaña electoral di 5 strea tambe. Nos ta keha di corupcion pero ta nos mes ta e origen y culpable ya cu nos ta gusta fiesta , carnaval y dorna nos casnan cu propaganda politico siendo cu no tin ningun necesidad pa cu esaki. Un mentalidad pober, infantil y inecesario y cu ta costa hopi loke ta duna oportunidad pa bigfish sigui sponsor campaña y despues ta abo mes cu a pone propaganda na cas mester paga p’e y bira victima di esaki.

Grow up pueblo!!.

E Ley di financiamento di campañanan politico mester bin pero prome cu esaki tuma lugar mester bin tambe un ley pa regula y structura campañanan politico cu enfasis pa mantene e secrecia di voto di tur ciudadano. Mester bin un campaña di concientisacion y un cambio di mentalidad. Tur propaganda politico mester ta ariba tereno publico designa( mescos cu na Hulanda p.e. ) na unda cu nan ta visibel den tur bario y NO na cas di ciudadanonan cu tin derecho di nan secrecia di voto. Hasiendo esaki lo nifica cu no lo bay tin mester di hopi capital mas y facil partidonan lo por financia nan campañanan y posibelmente te hasta placa lo resta cu lo por ser duna na causanan caritativo. Nos mester vota di acuerdo cu nos consenshi y no a base di influencia di propaganda politico. Ban Madura!!!.

 

Un bon observador

 

- Advertisement -

DUNA COMENTARIO

Please enter your comment!
Please enter your name here