Home Suceso Chauffeurnan di Heavy Equipment a blokea rotonde di Cumana como protesta

Chauffeurnan di Heavy Equipment a blokea rotonde di Cumana como protesta

1986
1
SHARE
- Advertisement -

ORANJESTAD (AAN): Trafico a stagna na forma increible Diabierna atardi, net durante rush hour.

Varios compania local, chauffeur di heavy equipment na Aruba, a dicidi na blokea e rotonde temporal di Watty Vos Boulevard na Cumana.  Esaki como un protesta directo relaciona cu e hecho, cu e contratista principal pa construi Watty Vos Boulevard a dicidi pa bypass tur compania y doño di heavy equipment local, y a importa como 26 vehiculo pisa for di Peru.

GOBIERNO DI AVP A PASA FASTBALL:
E compania a trece su mesun trucknan di exterior, y Gobierno a duna permiso tambe.  Ta parce cu Gobierno di AVP mes ta bezig ta boycot comerciantenan local.

Esaki a cay den masha mal tera mes y e chauffeurnan di truck a dicidi na cuminza un protesta, y a blokea e rotonde aki net Diabierna na momento druk den trafico.

Nan ta disgusta cu e compania ta logra importa Trucks di Peru, sin paga ningun clase di impuesto di importacion.  Y pa colmo, tin indicacion cu nan mes ta bin cu nan mesun Diesel for di Peru.  E ultimo aki no a wordo confirma ainda.

TRUCKNAN NO KIER CUMPLI CU POLIS:
Mientras tanto Polis a yega y ta purba na papia cu e chauffeurnan, indicando na nan cu e protesta ta ilegal.  Por a mira cu hasta Halto Comisario ta presente.  E chauffeurnan na nan turno, ta contestando cu loke Gobierno di AVP a haci cu e trahadornan Arubiano ta ilegal.  Con ta permiti e contratista bin cu su mesun heavy equipment?  Unda e promesa pa defende trahadornan Arubiano a keda?

Oficial Sr. Soemers di Cuerpo Policial a pidi e chauffeurnan pa nan hala nan truck pa cu e protesta ilegal aki, sino lo yama Takelwagen pa hala e vehiculonan.  Na Aruba kizas ta 2 of 3 Takelwagen so tin cu por hala truck.

Un rato despues, Halto Comisario tambe a papia cu e persona cu a wordo mira como esun cu a coordina e protesta, y e tambe a bise cu e tin di hala e trucknan, sino lo busca Takelwagen.

Sinembargo e chauffeurnan a protesta, y rechaza e demanda.  Nan ta pidi pa Ministro di DOW, esta Benny Sevinger, of kizas Prome Ministro Mike Eman presenta pa asina e bin splica cada uno, di con Gobierno di AVP ta haciendo e mal hecho aki cu e pueblo trahador.  E trucknan tey keto bay blokeando e rotonde, pasobra nan ta defende nan pan di cada dia.

MINISTRO LO REUNI CU NAN:
Despues cu e chauffeurnan di truck no a bay di acuerdo cu e ponencia di Polis pa nan hala nan vehiculo, a resulta cu un coordinador di Ministro Benny Sevinger, a logra contact e titular di Obranan Publico, y a haya un contesta, cu un “reunion” ta planea pa tuma lugar Diabierna anochi mes pa 8:00 pm, na Oficina di Gobierno.

Ora cu a tende esaki, Cuerpo Policial a dicidi na hala un banda, y no ta molestiando e chauffeurnan di truck mas.

— Aki por mira parti di e Heavy-Equipment cu a yega Aruba for di Peru. Esaki a pone fuse bula di chauffeurnan local….

Awor e chauffeurnan ta formando un comision, cu ta esnan encarga pa bay reuni pa 8:00 pm cu Ministro di Infrastructura.

Aki nan lo enfatiza, con ta posible cu Gobierno di AVP ta pone prioridad pa companianan di exterior, y di e forma ey neglishando e trahadornan Arubiano di gana nan pan di cada dia.  E pregunta di nan ta, ta vale la pena e proyectonan PPP aki siendo cu ta compania di exterior ta haya tur cos den teblachi den nan man?

DIARIO a nota cu ni maske cuanto forma Polis a trata na trankiliza e chauffeurnan, tog nan ta decidido pa defende e clase trahador di Aruba.  No solamente e contratistanan cu ta haya e trabaonan lucrativo aki ta opta pa usa nan mesun equipo, pero ta prefera di pone Arubiano un banda.  E momento a yega pa purba cambia e “mindset” di Gobierno aki, cu ta parce di gusta laga su propio yiunan di tera na caya.

UPDATED:  7:01 pm

- Advertisement -

1 COMMENT

  1. Esaki ta inaceptable….si ta AVP ta hasi esaki contra nos Arubiano anto ta un bon momento pa pueblo por refleha ainda na tempo.Awo mes ta asina, korda despues di elecion

DUNA COMENTARIO

Please enter your comment!
Please enter your name here