Home General Den encuesta di POR segun mr. Bikker: 72% di personanan cu...

Den encuesta di POR segun mr. Bikker: 72% di personanan cu a responde ta apunta inseguridad como preocupacion primordial

88
0
SHARE
- Advertisement -

 

ORANJESTAD (ANN) – Den conferencia di prensa semanal di Partido POR, Plataforma e Forza Nobo, Parlamentario mr. Andin Bikker, tabata tin como prome tema di agenda e inseguridad di nos pais.

Bikker a señala cu e inseguridad ta keda e preocupacion di mas grandi pa nos poblacion, y e ta haya cu Prome Minister mr. Mike Eman, mester bin duna un splicacion na pueblo, y responsabiliza su mes di un bez pa tur.

Esaki mirando cu Partido AVP a acerca y a presenta señor Candelaria como candidato, dunando asina di conoce cu nan no tin confianza riba e maneho cu sr. Arthur Dowers ta hibando riba e tereno di seguridad.

POR ta dune razon den e sentido aki pasobra nan tampoco tin confianza den su maneho, y na di dos lugar, Prome Minister di un pais tin un co-responsabilidad encuanto orden publico, y seguramente ora tin un inseguridad mientras cu e mes a bay campaña cune (2009) unda cu el a traha un video indicando cu e ta bay restaura seguridad den nos pais.

Sinembargo, apesar cu tin cierto carteranan cu ta touch cu orden publico, no ta tende Prome Minister papia tocante inseguridad.

Parlamentario mr. Bikker a subraya cu na final di dia, e como Prome Minister ta esun cu ta guia e Gabinete y tur cartera, basicamente, den e maneho general cu ta cay bao di dje.

Bikker a reitera cu awor cu nos pais a conoce e di 58 atraco cu a wordo cometi ayera, anto esaki a cuminza bira cu cada pasa un dia tin biaha tin dos atraco manera el a señala siman pasa.

Bikker ta haya cu ta increible cu Prome Minister no ta bin dilanti ni duna un tiki declaracion, pero ta keda den un tipo di campaña di haci cos bunita, pero no ta asumi su responsabilidad como prome mandatario.

POR ta keda constata, segun mr. Bikker, cu Prome Minister ta sigui core pa su responsabilidad, y esaki ta hopi serio pasobra ora un persona ta asumi e compromiso di guia un pais, e mester toca tur e aspectonan, esnan bunita pero tambe e retonan pa cual pueblo a pone goberna.

Ora pueblo ta bay urna electoral e ta elegi mandatarionan, representantenan di pueblo, pa nan soluciona problemanan di pueblo, y mehora e situacion di e pais.

Bikker a acentua cu den tur e consultanan cu POR a haci cu pueblo pa nan por a yega na nan plan di gobernacion, y e plan di accion prome cu esey, e prioridad number uno cu mester atende ta e inseguridad riba nos Isla. El a subraya cu 72 porciento di personanan cu a contesta e encuesta ta bisa cu e problema number uno cu nan kier mira soluciona, ta inseguridad.

El a reitera cu ora di mira cu den apenas siete luna ya caba 58 atraco a sosode na Aruba, mientras cu na 2016 a kibra e record di 60 atraco, por conclui cu e situacion aki ta hopi preocupante.

Bikker mes a presenta varios mocion di desconfianza riba Minister di Husticia, y e ta spera cu pueblo tambe mester realiza cu si e kier un cambio mester vota pa e cambio.

El a reitera un bez mas cu e Minister mes mester saca su conclusion si no pueblo mes ta sake pe dia 22 di September. Pero e ta keda enfatiza cu Minister Presidente ta visiblemente ausente di e situacion aki.

- Advertisement -

DUNA COMENTARIO

Please enter your comment!
Please enter your name here