Home General Diego de Cuba: Mayoria absoluto trahadornan di NV ELMAR kier pa STA...

Diego de Cuba: Mayoria absoluto trahadornan di NV ELMAR kier pa STA representa nan

63
0
SHARE
- Advertisement -

ORANJESTAD (AAN) – Presidente di Sindicato di Trahadornan di Aruba (STA) sr. Diego de Cuba, den entrevista cu Matutino DIARIO, a confirma cu STA a reuni cu un grupo di trahadornan di NV Elmar, siman pasa.

E tabata un grupo chikito di cual sr. de Cuba a compronde cu nan tin problemanan bastante serio cu e sindicato UEA y door si esey nan a tene un reunion, cu a tuma lugar na Piedra Plat Entertainment Center.

STA a wordo invita pa e reunion aki y nan a bay pa scucha nan problemanan. Sorpresivamente, 80 di e trahadornan a tuma e decision cu nan ta afilia na e Sindicato STA, y di nan 71 a entrega carta di retiro, segun sr. De Cuba tin entendi.

De e cantidad aki 46 a entrega e carta na STA y 25 directamente na UEA. Kiermen, nan no kier pa UEA representa nan mas pa e compania ELMAR.

“Nos a splica nan si e situacion riba mesa, y nos a bin compronde tur e problemanan cu tin andando. Loke ta pasa ta cu nos di STA, prome cu nos bay firma algo, nos ta consulta cu nos miembronan. Prome cu nos cera un CAO nos ta laga nos miembronan vota y pa nan tuma nan decision. Esaki no ta diferente na ningun compania cu nos ta atende cu nan y esaki lo no ta diferente na UEA”, de Cuba a subraya.

UEA, aparentemente, lo tin protocolnan riba mesa, conhuntamente cu Gerencia di NV Elmar, cual lo por ta desastroso pa e trahadornan di e compania.

Akinan ta caminda cu STA mester drenta y ruim op, segun Diego de Cuba. “Nos a bisa cu nos ta dispuesto pa haci esaki”, de Cuba a subraya.

Tambe el a acerca oficina di mediador, pa splike na placa chikito kico realmente e situacion ta y cu e deseonan di e trahador lo wordo vocifera door di e sindicato STA.

“Nos lo bay trata di convence Mediador y e Gerencia di ELMAR cu aworaki ta sindicato STA lo bay representa e trahadornan y cu e cantidad di e membresia aki ta un mayoria absoluto, pa trata di convence e Gerencia di ELMAR pa evita e caminda di referendum, pa nan reconoce STA y bay sinta na mesa di biaha y trata na yega na solucionnan rapido riba e dilemanan aki, pasobra e situacion aki por desemboca den un accion y tur hende sa cu un accion na ELMAR ta haci dolor”, Diego de Cuba a subraya.

STA lo bay para tras di su miembronan si esey ta bay ta nan decision y e ta spera cu Mediador logra convence Gerencia di ELMAR. De Cuba a papia tambe cu su abogado pa wak con lihe nan por papia riba e asunto aki pa wak con leu nan por yega cune, y con lihe por yega na un solucion.

STA ta haya cu esaki ta di lamenta pasobra nan a kere cu tur cos tabata bayendo bon, pero nada tabata bayendo bon. Diego de Cuba a señala cu nan no mester bruha e contratonan di trabao individual cu esnan colectivo. Esnan individual ta hendenan cu ta parti di e gerencia y esaki mester atende cu e trahadornan aki completamente separa. El a subraya cu ora el a lesa e protocol ta manera nan a hinca tur cos den otro y esey no por. E empleadonan cu tin contrato individual nan salario ta hopi halto, mientras cu di e CAOnan no, nan ta limita. Tambe nan tin un problema di maximo cu minimo, cu nan kier bin cune y pa aña 2010 ningun hende lo conoce aumento di salario mas. STA a indica cu esaki no ta cuadra.

STA ta studiando esaki masha profundo y locual por a saca for di CEO y e protocol e cosnan aki no ta bon pa e clase trahador. E ta bon pa cualkier gerencia pero pa e clase trahador no.

De Cuba a sigui bisa cu den e caso di NV Elmar, nan ta bay trata di yuda e hendenan aki, pero logicamente no ta di dia pa anochi nan ta soluciona un problema cu tey for di hopi tempo caba. “Pero nos ta kere cu nos tin e formula pa drenta e asunto aki, y manera mi a bisa pakico daña algo cu tabata bon” Diego de Cuba a subraya.

Tin incluso funcionnan cu no ta aparece mas den e CAO y esey STA ta haya masha straño. Antes nan tabata tey pero aworaki nan disparce for di e Contrato Colectivo.

E lider sindical a agrega cu hecho ta keda cu si tin un contrato colectivo riba mesa, nan tin cu habrie for di otro, y si mester agrega un addendum esey lo mester pasa. Of, si gerencia bay di acuerdo nan tin cu negocia un contrato colectivo completamente nobo pa e trahadornan. Esey no ta imposible, e por tambe. Un CAO completamente nobo pero cu base den esun cu ta andando. “Mi ta kere cu STA tin un trabao grandi pa ehecuta”, de Cuba a remarca.

 

 

 

- Advertisement -

DUNA COMENTARIO

Please enter your comment!
Please enter your name here