Home Hudicial Diez luna di prison pa homber cu a tene relacion cu mucha...

Diez luna di prison pa homber cu a tene relacion cu mucha bao 16 aña

2238
0
SHARE
- Advertisement -

ORANJESTAD (AAN): E homber di inicial T. a admiti di tabatin un relacion cu un mucha bou di 16 aña. E ta admiti tambe cu e sa cu esey no por. Aunke cu e relacion tabata voluntario, e ta castigabel pa ley. Hues a confirma e exigencia di Fiscal cu ta 15 luna di prison pa T. di cual 5 luna ta condicional cu un tempo di prueba di 2 aña.

TENE RELACION CU MUCHA

E acusacion cu Fiscal a presenta contra e homber T. ta cu entre Januari 2017 y 28 di April 2017 el a tene relacion sexual cu un mucha bou di 16 aña.

SOSPECHOSO TA ADMITI

Ta asina cu T. a admiti di tabatin relacion voluntario cu e mucha. El a bisa Hues cu for di Augustus 2016, el a conoce e mucha caminda nan a enamora di otro y tabatin relacion sexual voluntario. T. tabata sa cu e mucha ta menor di edad. Hues a puntra con T. ta mira e asunto awor.

Segun T. e caso ta hopi fastioso p’e y e mucha. Hues a puntr’e si e tin contacto ainda cu e mucha. El a bisa cu e no ta papia mas cu e mucha. El a bisa cu e y e mucha tabata gusta otro. Hues a puntra T. si e tabatin un otro amiga. Segun T. e no tabatin otro relacion y cu diferente biaha el a bisa e mucha cu nan relacion no por sali na cla pasobra lo tin problema.

Pa loke ta e circumstancia personal di T., el a bisa Hues cu e tin un yiu muher di 2 aña y e tabata paga school y tur cos pa e mucha. Awor e grandinan di e mucha ta haci fastioso pasobra e no ta duna placa mas. Segun T. e tabata busca e mucha na school y despues e tabata hiba na e wela caminda mama di e mucha ta biba.

EXIGENCIA DI FISCAL

Fiscal ta haya legalmente proba cu T. tabatin relacion sexual cu e mucha. Fiscal a mustra cu e mayornan di e mucha a haci denuncia. E relacion tabata completamente voluntario. Fiscal a bisa cu e ta tene cuenta cu esey pero segun ley un homber adulto no por tene relacion sexual cu un mucha bou di 16 aña.

Na opinion di Fiscal, T. ta un adulto y e mester sa mihor. El a mustra cu casonan asina ta worde hopi cuestiona na Aruba. Fiscal a exigi 15 luna di prison di cual 5 luna ta condicional cu 2 aña di prueba. Fiscal a bisa cu normal ta exigi 18 luna di prison pa delito asina pero e biaha aki e ta tene cuenta cu tur circumstancia.

Abogado mr. Edward ta haya cu e relacion ta manera e ta. Ta asina cu e relacion a bay for di control. El a pidi Hues pa duna T. mas castigo condicional pa asina e por bay traha y pa haya apoyo pa no cay mas den tentacion asina. El a siña su les.

Hues a puntra T., si e mester en realidad ayudo. Segun T., e no ta kere y cu loke a pasa ta pasobra e tabata hopi na e cas di e mucha. Awor el a siña su les.

SENTENCIA

Hues a sera tratamento di e caso y a dicta sentencia di biaha. Hues ta haya legalmente proba cu T. tabatin relacion sexual cu un mucha. E relacion tabata voluntario pero esey no ta permiti pa ley. Hues a bisa cu e ta comparti punto di bista di Fiscal cu casonan asina ta hopi serio y ta confirma exigencia di Fiscal. Hues a condena T. na 15 luna di prison di cual 5 luna ta condicional cu un tempo di prueba di 2 aña.

 

- Advertisement -

DUNA COMENTARIO

Please enter your comment!
Please enter your name here