Home General Director di SVb: “Pensionadonan por haya nan loonopgaaf pa belasting via...

Director di SVb: “Pensionadonan por haya nan loonopgaaf pa belasting via internet tambe”

342
0
SHARE
- Advertisement -

ORANJESTAD (AAN) — Departamento di Impuesto a anuncia poco dia pasa cu e declaracion pa impuesto di entrada pa 2016 a sali. Un grupo di ciudadano cu tin e obligacion di yena e declaracion aki ta pensionadonan cu ademas di nan pension di behes di SVb tin un otro entrada. Den cuadro di esaki nos a acerca director di Banco di Seguro Social, SVb, sr. Edwin Jacobs, pa haya informacion tocante ki paso pensionadonan mester tuma pa por ricibi e asina yama loonopgaaf di nan pension di AOV pa por yena nan declaracion di impuesto.

Kico ta un loonopgaaf?

Sr. Jacobs a cuminsa na splica cu un loonopgaaf ta e resumen di e total di suma di pension ricibi durante un aña. Y tur pensionado tin derecho di ricibi e loonopgaaf aki, aunke cu no ta tur pensionado mester di esaki. Sr. Jacobs ta sigui splica cu den pasado, sigur prome cu 2010, e pensionado por a pasa busca e loonopgaaf na departamento di pension di SVb. E tempo ey caba e oficina di SVb tabata bira congestiona pa algun siman y pensionadonan mester a warda hopi pa por ricibi e resumen aki.

Con e servicio tabata

Den su afan pa reduci e tempo di warda na SVb y tratando na mehora su servicio, SVb a cuminsa ta manda e resumen pa e pensionadonan na nan cas. Aki SVb a encontra cu dos problema. Pensionadonan ta muda pero no ta cambia nan adres na SVb, cu e consecuencia cu toch e resumennan no tabata yega unda e mester yega. Un otro problema cu SVb a encontra tabata cu e resumennan tabata keda bon warda cu despues no tabata facil pa haya esaki bek. E consecuencia tabata cu toch e pensionado tabata acudi na SVb su oficina pa pidi pa print e resumen. Pues, SVb a constata cu e mandamento mediante post tampoco tabata efectivo. Y mientras tanto e cantidad di pensionadonan ta sigui aumenta. Sr. Jacobs ilustra esaki mustrando cu na final di 2007, 11.784 pension a keda paga na Aruba, mientras cu na final di 2016, un total di 18.901 pension a keda paga na Aruba.

Servicio digital nobo

SVb, mester a busca un otro forma pa ofrece un mihor servicio na su pensionadonan.

Y asina entrante aña pasa, SVb a pone na disposicion di su pensionadonan e posibilidad pa mediante e website di SVb haya acceso tur momento di dia y durante henter aña na su loonopgaaf.

Sr. Jacobs ta splica cu e pensionadonan di e generacion nobo, por lo general tin mihor dominio di tecnologia y por traha cu computer y cu esey den mente a desaroya e servicio nobo aki.

Sr. Jacobs ta mustra cu pa e pensionadonan cu sa con pa anda cu computer, ta sumamente facil pa ricibi nan loonopgaaf. Sr. Jacobs ta mustra e pasonan pa sigui:

Bishita website di SVb: www.svbaruba.org

Click riba Pensioen

Escoge MiPensioen

Den e bentana nobo cu habri, click riba e opcion pa registra como usuario nobo

Scoge un username di preferencia

Yena bo email

Crea un password y confirma esaki. Pa esaki tuma nota di e rekisitonan

Bay na bo email y ey ta ricibi un link pa activa su cuenta

Pa activa e cuenta, mester tin na man su number di AOV, cual ta ricibi riba e desicion cu SVb ta otorga e pension. Sigui e pasonan y yena e informacion solicita y facilmente ta activa e cuenta.

Di e forma aki e pensionado por crea su mes un cuenta riba e website di SVb y por disfruta di un forma facil di e servicionan digital di SVb, entre nan esun di print su loonopgaaf pa yena su declaracion di belasting.Sr. Jacobs ta menciona cu den caso di cualkier problema, por contact departamento di Pension na 5272760 pa asistencia.

Pa termina sr. Jacobs ta enfatisa cu e servicio digital aki no ta reemplasa e posibilidad di e pensionado pa pasa na SVb su departamento di Pension pa busca su loonopgaaf. Cu e servicio digital, SVb ta desea di facilita e pensionado cu un servicio rapido y 24 ora pa dia.

 

- Advertisement -

DUNA COMENTARIO

Please enter your comment!
Please enter your name here