ORANJESTAD (AAN) – SKOA a reuni cu Directie Onderwijs diamars, pasobra no ta solamente e capacidad di cupo den scolnan MAVO ta un preocupacion, aworaki, pero tambe e kleuterschoolnan na e region di Playa, Paradera y Noord.
Asina Josette Daal, directora di SKOA a duna di conoce den entrevista cu Matutino DIARIO.
E capacidad di e scolnan aki tambe ta yen. SKOA tabata tin 35 mucha cu no por a ubica den Paradera bibando aki mes, pero no por a yega na un consenso cu Directie Onderwijs, riba un extra klas.
SKOA a papia cu e mayornan kendenan a coopera pa e yiunan bay un Kleuterschool na otro caminda pafo di Paradera.
Mirando e situacion cu SKOA tin mas como 200 mucha pa drenta MAVO ciclo basico 1, y esey kiermen cu otro aña e 200 muchanan aki lo move pa ciclo basico 2, y esey ta bira un MAVO Scol. Esey ta nifica cu SKOA mester cuminza cu e proceso pa pidi pa un MAVO Scol nobo.
SKOA ta bezig cu esaki conhuntamente cu obispado, pa wak kico ta e posibilidad y na unda e scol aki lo mester bin. E lo no bin pa otro aña pasobra e ta un proceso basta largo, Josette Daal, directora di SKOA a indica.
