Home Deporte E baca mester hoga pa nos haya sa kico ta pasando den...

E baca mester hoga pa nos haya sa kico ta pasando den e mundo di deporte

433
0
SHARE
- Advertisement -

ORANJESTAD (AAN): Dialuna durante e conferencia di prensa cu a wordo yama pa Minister Schwengle pa asina su persona por a elabora riba e problematica cu ta andando cu Pony League, Diario Deportivo a sinta keto y scucha atentamente tur locual cu Minister y su Partnernan a vocifera. Na final di full e conferencia di prensa, e unico conclusion cu Diario Deportivo por a saca ta, pakico laga e baca hoga, pa awo bin splica pueblo kico ta pasando den e mundo di deporte y kico ta procedura.

Diario Deportivo sa cu e articulo aki, lo pone hopi persona rabia y zapatia, pero nos mester yega na e punto cu e berdad mester wordo bisa. E asunto aki di warda te ora cu e baca hoga pa despues Sali afo y play Super Hero Mester stop. No ta awo nos tur sa kico ta e problema cu ta pasando den e mundo di deporte. Aña aden y aña afo practicamente ta e mesun problema Diario Deportivo mester scucha. Ken ta bin na aanmerking pa haya Subisidio. Pakico e federacion ey ta haya mas placa cu nos y mucho mas. Hasta a yega asina leu, cu algun federacion a cuminsa cuestiona integridad di esnan na cabes.

Transparencia:

Diario Deportivo tin hopi aña caba ta scucha cu “NOS” ta bay publica tur cifra pa asina Aruba completo por mira ken y cuanto un federacion ta ricibi for di Lotto of Subsidie Comissie. Esaki ta conta si Bo ta afilia na, ASU of COA. Te awe Diario Deportivo no a ricibi nada. Durante e conferencia di prensa nos a mira un Minister di Deporte sumamente rabia pasobra nan ta tilda su persona, su maneho, a vocifera den voz duro, cu e siman aki Gobierno ta bay publica tur e cifranan, cu excepcion pa esun di 2016-2017 pasobra ainda tin algun cifra pending. Laga nos corda Minister Schwengle cu su siman ta caba diabierna y si e ta desea, e por haya 1 dia extra cu ta diasabra. A yega ora pa Gobierno cuminsa hustifica pakico cierto federacion ta haya un schaat di placa, y pakico esnan cu tambe ta cumpli cu tur rekisito, igualmente cu e otronan, no ta ricibi e cantidad di placa manera e otro. Acaso cu ta midi cu dos midi? Acaso cu tin un Madrina of Padrina ta pusha pa un y no e otro? Diario Deportivo hamas y nunca lo kier conclui cu esaki ta e caso, pero un biaha mas, si no ta splica, si no tin transparencia, esaki ta e conclusion cu pueblo lo saca afor.

Comunicacion:

Pakico laga e baca hoga, pa dialuna durante e conferencia di prensa Minister Schwengle y Director di Lotto pa deporte ta Sali y splica pueblo kico tur ta e problema cu nan tin cu Sr.Benjamin Francees y Pony League. Dicon no a Sali mas trempan y a alerta mayornan kico lo ta e consecuencia si Sr.Benjamin Francees no cumpli pa paga su debe y alaves sinta na mesa. Mi ta kere cu si mayornan tabata bon na altura, nan lo por a prepara di un otro manera pa asina nan yiunan no pasa den tur e problema aki pa bay representa ARUBA. Tin biaha Diario Deportivo ta sinti cu Minister di Deporte no tin un team pa asina controla kico tur ta pasando na Aruba den e mundo di deporte. Aruba completo sa kico tur ta pasando, menos Minister di Deporte. Something Wrong!!

Conclusion:

Diario Deportivo no ta akinan pa defende Gobierno of caba cu Gobierno, of defende / kibra Sr.Francees. Diario Deportivo ta akinan pa nos bringa pa e muchanan. E desaroyo di nos muchanan ta na prome lugar. E mucha no tin ningun culpa den decisionnan cu adultonan ta tuma. E mucha ta presenta na veld, y e ta practica e deporte cu e ta stima. Awo cu a yega e oportunidad pa e mucha viaha bay den exterior, e ora ey nos tin cu brinde e oportunidad pa bay cumpli cu su deber pa representa nos pais Aruba. A yega ora pa decisionnan di adulto STOP di perhudica nos muchanan. A yega ora pa saca politikeria afor di deporte. A yega ora pa stop di tin faboritismo den e mundo di deporte. Den otro palabra, manera cu Diario Deportivo a bisa den e rueda di prensa, a yega ora pa RUIM OP DE BOEL. Ta basta cu hende cu ta den un organisacion, fundacion, federacion djis pa saca probecho. Tin hende cu tin varios aña sinta den e stoel ey, y ora cu bo evalua kico tur nan a haci pa e deporte, NET NET NADA. Diario Deportivo tin hopi mas di bisa, pero pa awo nos ta bay lage te aki. Den nos proximo edicion, nos lo ilustra e diferencia entre Little League cu Pony League. Den cua liga e mucha ta progresa mas? Ta sano pa pone tur e liga nan aki bao di un solo federacion?

 

- Advertisement -

DUNA COMENTARIO

Please enter your comment!
Please enter your name here