Home Cultura E tratadonan cu a cambia e Historia di Panama cu influencia riba...

E tratadonan cu a cambia e Historia di Panama cu influencia riba America, Caribe y mundo

34
0
SHARE
- Advertisement -

Den contexto celebracion di 40 Aniversario:

ORANJESTAD (AAN) – Omar Torrijos- Herrera: “Un millimeter so den e direccion corecto di e historia, ta un avance mil biaha mayor, cu un meter den e direccion opuesto na esun di nos progreso”.

Basa riba e historia skirbi pa Omar Jaen Suarez, ken tambe a participa den e negociacionnan cu a conduci na e Tratadonan Torrijos-Carter. Matutino DIARIO ta conclui, e parti aki di e tratadonan cu a cambia e historia di Panama, cu un resumen compact di con a yega na finaliza y firma e acuerdonan aki.

Jaen Suarez ta conta cu riba dia 13 di Maart 1977 e negociadornan Mericano a propone, na Washington, e celebracion di dos tratado: e formato definitivo: esun di e Canal di Panama existente cu termino fijo, y esun di su neutralidad permanente.

E negociacionnan na Washington a sigui y General Omar Torrijos ta nombra un Embahador nobo dilanti Gobierno di Merca, yama Gabriel Lewis Galindo. E persona aki a facilita grandemente e negociacionnan danki na su contactonan personal y su relacion di confianza cu el a establece cu Presidente Carter y cu senadornan clave, ademas di su accion didactico riba e propio Hefe di Estado Panameño, cu tabata conoce tiki di e idiosincrasia y circumstancianan di e gran Potencia, esta Merca.

No obstante e bon intencion di Presidente Carter, e Presidente Torrijos, cu desconfianza riba Merca, a sigui su intenso actividad di gestion internacional.

El a logra cu dia 17 di Januari 1977, e presidentenan di Mexico, Venezuela, Colombia, Costa Rica, Honduras y El Salvador, uni na su causa y solicita e Presidente Carter, cu tabata pa asumi e cargo poco dia despues, un definicion di e caso di Panama. Nan a encarga e Canciyer Costaricense Gonzalo Facio, e mision di transmiti e mensahe na e Secretario di Estado designa, sr. Vance.

Dia 3 di Maart General Torrijos, acompaña pa algun negociado ta reuni na Caracas cu Presidente Carlos Andres Perez, y di dia 12 pa 16 di April, cu un delegacion grandi a bishita Moammar El Gaddafi, hoben lider militar di Libia, y despues di poco tempo a reuni na Cancun hunto cu algun negociado, cu e presidente Jose Lopez Portillo. Ya Torrijos lo a agota tur su recursonan den e ambito internacional, y no tabata tin nada otro cu e habilidad di su negociadornan y e bon boluntad di e Presidente Jimmy Carter.

Dia 9 di Mei 1977 a inicia un ronda di negociacionnan na Washington cu tabata decisivo. Dia 10, e negociadornan Mericano a acepta e posicion general di Panama den e tema “tierras y aguas” den cual mas cu 40% di e Zona di Canal, cu areanan urbaniza importante, e Puertonan di Balboa y Cristobal, y e Ferocaril a reverti na Panama e entrada den vigencia di e Tratadonan, y e resto via transferencia gradual a lo largo di e siguiente 20 añanan.

E negociadornan di Panama a bolbe nan pais y Torrijos ta imparti e instruccionnan final: dia 31 di December 1999 e proceso di descolonizacion progresivo mester a caba, y mester a keda den man di Panama, di manera fisico y concreto, henter e teritorio y instalacionnan di e Zona di Canal, incluso e via interoceanico y eynan no mester permanece ningun soldat stranhero.

For di e fecha aki te dia 7 di September un proceso intenso a sigui. Dia 6 di September e texto y mapanan aproba pa ambos team di negociacion a keda aproba, y dia 7 di September, den e sede di OEA, a wordo firma solemnemente e Tratado concerniente na e Neutralidad Permanente di e Canal di Panama, su Funcionamento, y e Tratado di e Canal di Panama. Ambos cu su anexonan firma e dia anterior door di e negociadornan Escobar Bethancourt y Bunker y e co-negociadornan Royo y Linowitz. E firma final a tuma lugar entre e Presidente di Panama Omar Torrijos-Herrera y e Presidente di Merca Jimmy Carter, na Washington.

Matutino DIARIO ta gradici inmensamente e Fundacion Omar Torrijos y su director Lic. Guillermo Villalobos Sole pa tan interesante aporte. Otro articulonan vinculante lo sigui encuanto e figura mes di Omar Torrijos.

 

- Advertisement -

DUNA COMENTARIO

Please enter your comment!
Please enter your name here