Home Politica Enseñansa mester ta innovativo, atractivo y accesibel

Enseñansa mester ta innovativo, atractivo y accesibel

42
0
SHARE
- Advertisement -

ORANJESTAD    (AAN) – Enseñansa den cualkier pais ta wordo considera como e yabi di desaroyo pa un pais. Un desaroyo cu ta crea e oportunidad pa nos ciudadano por identifica su mes riba e normanan, balornan y e cultura cu ta esencial pa por participa exitosamente den un comunidad.

Nos sistema di enseñansa ta uno cu bo por considera anticua  y pega den tempo. Esaki ta pa motibo cu el a ser diseña e tempo ey pa prepara nos pa e periodo industrial. Pues e no ta cuadra cu e tempo moderno cu nos ta bibando aden actualmente. E mundo moderno cu nos ta bibando aden ta rekeri e desaroyo di habilidadnan nobo cu ta conecta cu e periodo actual cu ta e periodo di informacion. Un periodo cu ta rekeri pa pensa mas critico, siña resolve problemanan na un manera mas creativo, siña traha den grupo, haci uzo di tecnologia moderno y siña traha cu y maneha e abundancia di informacion existente. Un sistema cu tin cu prepara nos pa cumpli cu e demanda laboral actual.

E desaroyo di e problemanan social na Aruba ta bin grandemente tambe cu na dado momento e tarea di maestronan a cambia di ta “educadornan secundario” pa “educadornan primario”. Esaki significa cu e tarea di e maestro a bira mas pisa door cu e educacion basico di e mucha tambe ta cay riba nan. Maestronan ta sinti cu nan no ta haya suficiente sosten, guia, manpower y herment pa maneha e problematica creciente aki. Esaki ta un factor cu ta traha demotivante pa e maestronan. E demotivacion ta creciendo na un manera asina alarmante cu tin un polemica nobo cu no ta ser menciona. E aña aki tabata tin un gran cantidad di maestro cu a meld ziek pa motibo di stress, burn-out y hasta depresion. Como cu e topiconan aki ta considera como taboo na Aruba, e ta un problematica cu no ta ser discuti, pero si ta existi. Un bes mas tin cu enfatisa cu ta e maestronan ta esunnan cu ta carga nos enseñansa.

Diversificacion y tecnologia lo contribui na e accesibilidad di un enseñansa atractivo y innovativo cu lo enrikece e klasnan. Pero prome cu bay over na menciona esaki, mester percura pa e asina yama ‘randvoorwaarden’ (condicionnan basico) ta na su luga pa tur scol na Aruba. Por compara esaki cu e fundeshi di un cas. No por bay construi e dak si e fundeshi no ta na su luga. Scol mester ta un luga caminda e alumno ta sinti su mes na cas, un luga na unda e mester sinti su mes sigur y na unda e tin gana pa acudi su mes diariamente. Pa motibo cu nos sistema y infrastructura actual di enseñansa no ta bay man den man cu e desaroyo moderno actual, nos alumnonan ta percibi nos enseñansa como “laaf”.

Den un sondeo haci entre alumnonan, nan a duna e siguiente comentarionan: “Siña na Aruba ta laaf! Anto ora bo ta cansa lihe, bo no ta worry pa siña mas.” Un otro ta bisa: “Na MAVO ta puro buki. Mi mes no a tuma MAVO paso no tin practica y ami lo kier ta prepara pa locual mi ta bay enfrenta”.

Tumando na cuenta cu nos enseñansa y infrastructura ta uno anticua, mi meta den politica ta pa na momento cu mi ta forma parti di e gobernacion nobo, nos percura primeramente pa tur e scolnan tin e mesun facilidadnan cu ta cumpli cu e normanan y desaroyo actual como cu esun di futuro. Specialmente teniendo na cuenta cu basa ariba e hecho cu e uzo di tecnologia lo contribui na e acceso universal di educacion y e contribucion di calidad di siña y educa. A base di un plan structural nos lo percura pa nos maestronan por ehecuta nan trabou como educador dunando nan mas atencion, respet y sosten.

- Advertisement -

DUNA COMENTARIO

Please enter your comment!
Please enter your name here