Home Hudicial Fiscal a apela contra pa declara sospechoso di a mishi cu mucha...

Fiscal a apela contra pa declara sospechoso di a mishi cu mucha muher di 8 aña liber

138
0
SHARE
- Advertisement -

ORANJESTAD (AAN): Algun siman pasa, DIARIO a publica e noticia cu Hues a declara un homber sospecha di a mishi cu un mucha muher di 8 aña liber. DIARIO tambe a publica cu ni Fiscal, ni mama di e mucha muher, a keda contento cu e decision di Hues. Investigacion cu DIARIO a haci ta mustra cu Fiscal a apela e sentencia.

MISHI CU MUCHA DI 8 AÑA

Dia 6 di Juli 2017, tratamento di e caso a tuma lugar caminda e homber L. no a presenta y no tabata abogado. E acusacion cu Fiscal a haci contra L. ta cu entre 2013 y 28 di November 2015 el a mishi y penetra cu su dede den un mucha muher di 8 aña.

Hues a mustra cu e mama a haci denuncia di loke su yiu a cont’e. Tin relato di dokter di mucha. Dokter ta bisa cu por constata cu e mucha a wordo molestia pero no tin penetracion. Tin familiarnan cu tambe a duna declaracion di kico a sosode cu e mucha.

EXIGENCIA DI FISCAL

Fiscal a bisa cu e mama a declara na Polis cu dia 29 November 2015 durante cu tabata mira television cu su yiunan, e yiu muher di 8 aña a bisa cu el a wordo molestia. E mama a haci denuncia na Polis y e sospechoso a wordo deteni.

Fiscal a bisa cu e sospechoso a desmenti categoricamente. Mama di e mucha ta bisa cu su yiu a bisa cu el a sinti hopi dolor. E victima a bisa con el a wordo molestia. E mucha a conta cu nunca el a kita su paña pero cu e sospechoso a mishi cun’e y tabata kita su paña.

E mucha a contra su prima, kende tambe tabatin 8 aña, di tur loke L. tabata haci cun’e. El a hasta pidi e prima pa no lag’e su so cu L.

PRUEBA DI SOSTEN

Fiscal a bisa cu den casonan di inmoralidad ta fastioso pa presenta cu prueba pasobra hopi biaha te e declaracion di e victima contra e declaracion di e sospechoso. Mester busca cu prueba di sosten a base di otro declaracionnan cu ta mustra circumstancia of situacionnan cu ta cuadra cu loke e victima a declara.

Fiscal a mustra cu Corte Supremo na Hulanda den sentencia ta bisa bon cla cu por usa pruebanan di sosten y no tin regla specifico pasobra cada caso ta diferente.

Fiscal a menciona varios caso na Hulanda di Corte Supremo caminda a haya prueba a base declaracion di e victima y circumstancianan. El a hasta mustra riba un caso di un persona homber cu lo a saca su parti intimo pa un dama. E dama su declaracion no tabata suficiente pero declaracion di otro personanan, kendenan no a mira kico a sosode pero si a mira e dama y e situacion cu tabata reina, Corte Supremo a considera suficiente pa condena e persona homber.

Den e caso penal contra e homber L., Fiscal ta haya cu tin suficiente prueba di sosten mirando kico e personanan ta declara. El a mustra cu e prima di e victima a bisa cu e victima a pidi’e pa no lag’e su so cu L.

Fiscal a mustra cu psycologo di mucha a bisa cu no tin motibo pa duda den declaracion di e mucha. Fiscal tambe a bisa Hues cu e detayenan cu e mucha a duna con tur cos tabata sosode, no ta mustra cu e lo a wordo instrui pa duna declaracion.

EXIGI 3 AÑA DI PRISON

Fiscal ta haya legalmente proba cu L. a penetra e mucha di 8 aña cu su dede. Esaki por perhudica e mucha pa hopi tempo. Ademas Fiscal ta haya cu L. a haci actonan inmoral cu e mucha door di mishi na su partinan intimo.

Fiscal ta haya cu L. a abusa di e confianza cu e mucha tabatin den dje. Fiscal a menciona diferente sentencianan di abuso di menor di edad cu ta varia entre 2 aña y 6 luna y 5 aña di prison. El a exigi 3 aña di prison pa L. y pa laga detene L.

HUES TA DUDA

Hues a sera tratamento di e caso y a dicta sentencia di biaha. Hues a bisa cu ta un caso hopi serio y ta kere cu mester impone castigo pisa si por prueba.

Hues a bisa cu e no ta haya cu tin suficiente prueba pa castiga L. Hues a mustra cu tin declaracion amplio di e victima cu ta mustra cu el a wordo molestia. Sinembargo tin diferencia den declaracion di e victima y su prima. Hues a bisa cu tin mas declaracionnan cu ta contradictorio. Tur esaki ta haci cu Hues ta duda si realmente e molester di e mucha a sosode. Hues a bisa cu e no ta exclui cu podise a sosode algo.

SOSPECHOSO DECLARA LIBER

Hues su decision tabata cu e tin demasiado duda y pesey ta declara L. liber.

FISCAL A APELA

For di e momento ey por a mira cu tanto Fiscal como mama di e mucha no tabata nada contento cu e decision di Hues. E mama a hasta expresa cu no tin husticia. Fiscal for di e momento ey a bisa Hues cu e tin dos siman pa apela.

DIARIO a haya confirmacion di Ministerio Publico cu Fiscal a apela e sentencia caminda Hues a declara e sospechoso liber. Esey ta nifica cu awor Corte Superior lo bay trata e caso di nobo. Hof, consistiendo di 3 Hues lo bay evalua e caso completo.

DIARIO lo keda pendiente pa e caso aki y lo informa lectornan di tur loke ta sosode den Corte di Husticia di Aruba.

 

- Advertisement -

DUNA COMENTARIO

Please enter your comment!
Please enter your name here