Home General Glen Thode oficialmente ta presidente di Conseho Electoral

Glen Thode oficialmente ta presidente di Conseho Electoral

68
0
SHARE
- Advertisement -

ORANJESTAD (AAN) – Conforme e decision di esnan cu e potestad di nombra e Presidente di Conseho Electoral, e funcion aki a wordo otorga na mr. Glen Thode.

Dialuna 17 di Juli mr. Thode a asumi su cargo nobo aki y mr. Hubert Maduro a bira Vicepresidente, di e Conseho Electoral.

“Mi kier a gradici señor Maduro pa e tempo cu e tabata presidente. El a haci un tremendo trabao pa e proceso asina importante, pa e democracia di Aruba cu ta e proceso electoral”, mr. Thode a expresa.

El a duna di conoce tambe cu cada partido mester entrega su lista di candidato riba Diabierna 4 di Augustus. Esaki lo sosode di 9’or di mainta pa 4’or di atardi, na Stadhuise.

Cada candidato mester presenta un carta di confirmacion cu e kier ta candidato, y un prueba cu a entrega un suma di mil florin na Directie Financien. Ademas mester presenta un potret 6×4, preto riba blanco, cu ta un potret exacto di e persona cu ta para na cabes di e lista, cu ta esun cu mester entrega esaki.

E colornan ta wordo ricibi Diabierna di e siman aki, pa medio di un decreto ministerial, di Minister Presidente. Esaki ta un proceso pa wak enberdad cual partido ta bay haya tal color riba e lista. E mester ta un color pa cada partido y si tin un partido cu tin dos color, e mester ta cla pa tur hende y no por tin partido cu tin mesun color of hopi parecido na otro.

Si esaki sosode pa lot lo wordo determina cual partido ta haya e color ey, y esey ta regla den ley.

Conseho electoral, mr. Thode a agrega, ta percura tambe pa integridad, orden y trankilidad di eleccion pa e eleccion bay sin tin duda riba e proceso of resultado. Prome cu mr. Thode a sinta como presidente nan a reuni un biaha pa analiza e materia di rijbewijs como documento di identificacion na momento di presenta na urna electoral. Ley ta stipula cu tin tres documento cu e votador por identifica su mes. E persona cu tin su carchi di vota mester identifica su mes di manera cu esun cu ta guia e proceso, cu ta traha den e urna concerni, por verifica e identidad di e persona cu tin su dilanti y mira confirma si enberdad e tin e derecho di vota den e urna ey, pues si e ta riba e lista di votador.

E lista di votador ta wordo saca for di e lista oficial di Registro Civil di Aruba, cu ta determina ken por vota, y e documento cu e votador ta presenta pa identifica su mes, mester ta valido.

Esey kiermen cu e documento ta cumpli cu cierto criterionan tambe den e ley di rijbewijs. Un di e criterionan ta cu e datonan ta exacto mescos cu e datonan di Registro Civil. Pero cu rijbewijs ta conoci caba cu tin hopi di nan cu no tin e datonan exactamente riba dje, skirbi of imprimi, cu ta esnan cu tin den Registro Civil.

Esaki kiermen cu ora un hende ta a bin cu su rijbewijs y cu su datonan no ta igual cu esnan di Registro Civil, no ta bay coincidi cu e registro di voto. E nifica cu lo no por acepta e documento ey como identificacion di e persona pa eherce su voto, pesey Conseho Electoral a aconseha tur hende cu derecho di voto pa nan busca un cedula pasobra e datonan riba dje lo ta exacto na esnan di Registro Civil y por consecuentemente na registro di voto, of e passport cu tambe ta garantiza esaki.

- Advertisement -

DUNA COMENTARIO

Please enter your comment!
Please enter your name here