Home Enseñanza Graduacion di tres Studiante Arubano na Gerrit Rietveld Academie

Graduacion di tres Studiante Arubano na Gerrit Rietveld Academie

134
0
SHARE
- Advertisement -

ORANJESTAD     (AAN):   Awor cu un otro aña academico a yega su final, Ateliers’89 ta orguyoso di por participa cu tres Arubiano a finaliza nan estudio exitosamente na e prestigioso academia di arte Gerrit Rietveld Academie(GRA) na Amsterdam.

E studiantenan aki ta Efrem Angela, den e ramo di “Fine Arts”; Nathaly Vlaun, den e disciplina di “Fashion”; & Chelsea Peterson, tambe den e ramo di “Fashion”, pero cu e distincion special di “cum laude”.

Ateliers’89 tin un trayectoria largo di colaboracion cu GRA; desde su inicio docente & ex-studiante afilia na e academia Hulandes ta bin Aruba pa duna curso & master-class y vice versa Aterliers’89 a guia & contribui na e formacion artistico di tantisimo hoben pa yudanan desaroya e portafolio necesario pa por cumpli cu e exigencianan di GRA. Ademas, e director di Ateliers’89, esta sr. Elvis Lopes, tambe a gradua di GRA & alaves a duna les na e instituto post-graduado di GRA, yama Sandberg Instituut.

Den cuadro di e graduacion di e studiantenan aki, como tambe na honor di algun otro hoben Arubano cu a termina nan aña escolar exitosamente, Angelo Tromp & Gijs Stork a ofrece un cena extravagante na nan residencia den centro di Amsterdam. E cena tabata consisti di cuatro plato & tabata na encargo di e chef Hulandes Juriaan Snellen, kende actualmente ta residencia na Canada, pero den pasado a traha añas largo na Flying Fishbone, Aruba.

Juriaan, hunto cu su esposa Sharinne Rasmijn, tabata na Hulanda pa e graduacion di su yui Brigitte Ellis, kende e aña aki a termina su estudio den “Ciencia Social” na Universidad di Amsterdam.

Pa dicho cena tabatin diferente otro studiantenan di Rietveld tambe invita, manera Natasha Oduber (kende lo gradua proximamente), Darwin Winklaar (kende a termina su aña exitosamente & lo continua den e ramo di “Fashion”), como tambe dos ex-alumno di GRA, esta Lillian Vlaun (Fine Arts) & Arthur Maduro (Design Lab), ambos graduado di Rietveld na aña 2015. E studiantenan aki, como tambe tur presente a expresa un palabra di gratitud n’e artista Elvis Lopez, pa tur su esfuersonan pa yuda hoben talentoso na Aruba pa sigui desaroya nan mes & sigui avanza den nan estudio na Hulanda.

Durante di e cena e invitadonan tambe a ser entreteni pa e talentoso cantante Mitchell Tromp (di Herman Brood Academie) & e docente di baile, kende tambe a gradua e aña aki di Amsterdamse Hogeschool voor de Kunsten, esta Kevin Gumbs.

Angelo, un persona no desconoci den e mundo cultural Arubano, & su pareja Gijs, sa habri nan hogar na mas occacion pa eventonan artistico cu un relacion cu Aruba. Asina den pasado tabatin exposicion di arte di Nelson Gonzalez & Robin de Vogel, e obra teatral “She Baltimore” di directora Ira Kip, presentacion di e soprano Imara Thomas, como tambe un concierto di Data Panik (unda te hasta Michael Lampe & Ken Wolff a graba nan proximo videoclip pa e grupo).

Por cierto, p’e aña aki Angelo tabata trahando riba un proyecto grandi di arte, cual lo a tuma lugar na Europa. Dicho proyecto tin un renombre internacional & pa prome biaha artistanan Arubano lo a haya un plataforma mundialmente pa representa nos isla. Lamentablemente & abruptamente e proyecto aki a ser cancela despues di algun desaroyonan na Aruba.

Ateliers’89 ta desea tur e graduadonan hopi exito den nan carera professional & kier informa alaves cu ta trahando riba un programa special pa 2019, esta e aña cu Ateliers’89 lo cumpli su di 30 aña di existencia.

 

- Advertisement -

DUNA COMENTARIO

Please enter your comment!
Please enter your name here