Home General Hotline pa Musiconan local haci denuncia di stranhero ilegal tocando den Hotelnan

Hotline pa Musiconan local haci denuncia di stranhero ilegal tocando den Hotelnan

714
0
SHARE
- Advertisement -

ORANJESTAD (AAN): Un boletin emiti Diabierna atardi door di Asociacion AMAA, esta Asociacion di Musico y Artista Arubano na defensa di e musiconan y otro artistanan local, ta mustra cu nan ta cla pa sali na defensa di esnan local.

Directiva di AMAA a splica cu ultimamente a haya varios keho cu tin musiconan di exterior  ta traha sin permiso di trabao na diferente establecimento di horeca, esta hotel, restaurant, lounge y discoteca.

Directiva di AMAA ta determina pa caba of en todo caso minimalisa e fenomeno aki. Cu e meta ey directiva a reuni ultimamente cu Guarda Nos Costa, pa pone nan na haltura di e problema existente y pidi nan cooperacion pa pone un fin na e practica ariba menciona.

Hefe di Guarda Nos Costa a duna su palabracion cu Guarda Nos Costa lo actua ora cu nan haya notificacion di AMAA cu tin un of mas musico of otro artista trahando sin e permisonan necesario.

Musiconan y otro artistanan di exterior trahando sin e permisonan necesario, no solamente ta un competencia inhusto pa nos artistanan local door di nan tarifanan hopi abao,pero nan y e doño(nan) di e empresa cu ta duna nan trabao, ta burla di y ta viola nos leynan y fuera di esey no ta paga ningun debchi na belasting.

AMAA lo pone tambe e departamento cu mester impone multa, esta DIMAS, na haltura, pa asina esnan cu ta comete tipo di infraccionnan asina contra ley, worde sanciona cu multanan corespondiente.

Directiva di AMAA ta pidi cooperacion di tur musico y artista pa pone AMAA na haltura di e practicanan ariba menciona. Na su turno directiva lo denuncia esaki na Guarda Nos Costa pa nan por tuma e pasonan necesario.

Bo mira algo ilegal, bo por yama e siguiente miembronan di directiva: Señora Maybelinne Arends na 582-1234, Señora Nicole Booi na 734-7370, Sr. Victor Camacho na 593-6333, Sr. Serghio Jansen na 592-0565, Sr. Victor Mathilda na 593-9559, of Sr. Sergio Tjie-A-Loi na 662-7029.

Tambe por notifica AMAA via email: amaaruba2016@gmail.com.

Directiva di AMAA ta spera cu esaki por sirbi como un advertencia serio pa e empresanan cu ta emplea of tin idea di emplea musiconan y otro artistanan di exterior sin e permisonan necesario. Musiconan y otro artistanan local corda cu union ta forsa. Bira miembro di AMAA.

 

- Advertisement -

DUNA COMENTARIO

Please enter your comment!
Please enter your name here