Home Hudicial Hues mr. Lemaire hopi preocupa: Criminalidad den hubentud na Aruba ta...

Hues mr. Lemaire hopi preocupa: Criminalidad den hubentud na Aruba ta hopi alarmante

702
0
SHARE
- Advertisement -

ORANJESTAD    (AAN) – Masha poco biaha, pa no bisa cu practicamente nunca, bo ta mira un Hues ta tuma e postura di kier yuda hobennan cu a cay den criminalidad y cu kier drecha nan bida. DIARIO a ripara cu mr. Lemaire y un otro Hues femenino sa haci esaki.

Recientemente den un entrevista cu vice presidente di Corte di Husticia di Aruba, mr. Lemaire, DIARIO a bisa e Hues cu por a ripara cu mr. Lemaire, bistiendo e pechi di Hues cu mester duna un castigo na e persona cu a haci malo, tambe ta bisti e pechi di tata den famia, ora ta trata di casonan di hobennan den criminalidad. Ta di aplaudi e hecho cu un Hues Hulandes, ta sinti pa yuda hobennan na Aruba cu ta cay den criminalidad.

DIARIO a puntra mr. Lemaire, kico ta haci cu e ta haciendo asina.

HUES PREOCUPA

Mr. Lemaire a splica na DIARIO cu e ta constata cu tin casonan caminda hobennan, door cu na cas no ta haya suficiente guia, ta cay riba e mal caminda. El a bisa cu e ta pensa cu si e tabata nan tata e lo no laga nan cay riba e mal caminda.

Mr. Lemaire a mustra cu hopi di e hobennan door di e circumstancia di no tin suficiente guia y atencion na cas, ta cay den circulo di amigonan robez y ta core caya. Esey ta haci cu e hobennan ta bay usa droga y horta.

CASTIGO DI PRISON OF AYUDO?

Mr. Lemaire ta haya cu e ta un plaga na Aruba y comunidad lo por pensa cu e hobennan no ta haya suficiente castigo.

Hues mr. Lemaire ta di opinion cu envez di castigo, e hobennan aki mester wordo yuda pa bay bek riba e caminda bon. Esaki por keda logra door di crea un structura di famia saludabel caminda tin hende cu ta mira pa nan y ta percura pa nan bay school.

SERA CRAAMCHI

Mr. Lemaire a mustra cu el a mira caso caminda tin di e hobennan tin mama y tata pero nan no ta scucha di nan. Mr. Lemaire ta kere cu pa yuda comunidad, mester percura pa e craamchi di criminalidad ta sera.

Mr. Lemaire ta di opinion cu si cada vez ta djis condena hobennan na castigo di prison, esey ta nifica cu gran parti di nan bida nan lo pasa den prison pasobra otro manera no por. Sinembargo tin algun di e hobennan cu si ta siña nan les y ta cambia nan bida.

SITUACION ALARMANTE

DIARIO a puntra Hues mr. Lemaire, den su trayectoria como Hues na Aruba, kico e ta haya mas alarmante. Mr. Lemaire a bisa cu e ta haya hopi alarmante e situacion di formacion di gang den  hubentud. E Hues a splica cu e hubentud ta tira riba otro y no ta haci denuncia. Despues bo ta mira con ta tuma venganza riba otro.

Mr. Lemaire a splica cu durante tratamento di un caso penal, un hoben a lanta su flanel y mustra con el a wordo corta na su bariga y a keda cu un sicatriz masha grandi. E hoben a bisa cu e no a haci nada pero door cu e ta forma parti di un gang caminda un dia promer lo a tira riba un miembro di un otro gang, el a wordo ataca y a tuma venganza riba dje.

Mr. Lemaire ta haya e situacion hopi serio y alarmante. No por permiti cu esaki ta sigui sosode.

Ta di spera cu Gobierno lo pone oido na e señalamento di Hues mr. Lemaire pa bin cu accionnan caminda no ta bay sera hobennan den prison sin mas sino ta busca manera pa yuda e hubentud bay riba e bon caminda. Laga e hobennan haya chens di por bay school of sigui cursonan special pa asina nan tin un ofishi y por traha pa mantene nan mes.

Laga e hobennan sinti cu nan ta forma parti di e comunidad aki y cu comunidad mester di nan pasobra ta nan mester bira e futuro di nos generacion.

 

- Advertisement -

DUNA COMENTARIO

Please enter your comment!
Please enter your name here