Home Politica Joselin Croes mustrando di ta contra di loke e slogan “Berd’e ta!”...

Joselin Croes mustrando di ta contra di loke e slogan “Berd’e ta!” ta representa

535
1
SHARE
- Advertisement -

ORANJESTAD (AAN): Segun Joselin Croes di Partido POR, e logo “Berd’e ta” di e partido AVP ta bisa hopi di e partido, su intencionnan y su manera di pensa y su manera di goberna. E ta representa tur loke ami como Arubiano hoben studia no ta para pe y no ta kere aden.

Den parlamento “Berd’e ta!” ta representa un stempel parlement cu yamas lo bay encontra di un proyecto of maneho of presupuesto di su gobierno cu ta Berde Berde, paso nan lealtad ta na e bandera berde di AVP y no na e bandera blauw, strepi geel strea cora di nos isla y su hendenan. Un cantidad di parlamentarionan sin voz propio. Si berdad nos tawatin un parlamento cu no tabata mara na e color politico di nan partido mi ta kere cu yamas  awe nos a yega na un debe nacional di 4 biyon Florin. Cualkier persona independiente y imparcial a obliga gobierno tin un balanced budget y pa no presta mas cu nos por paga back. Pero paso ta berde nan ta, nan mester cumpli cu ordo di partido y lubida cu ta pueblo a pone nan eynan pa ta nan voz y nan oido. Ta parce cu dia 22 di september tin eleccion pa ken ta bay goberna, pero e realidad no ta asina. Pueblo ta votando pa su 21 miembronan di parlamento. Si cu Dios su poder y confianza di nos pueblo mi logra drenta parlamento un dia, mi lealtad lo ta na mi pueblo y sigur no na mi partido. Mi voz y mi  decicion lo ta uno propio, basa riba lo mehor pa mi isla y mi hendenan. Bandera durante campaña ta leuk y tur pero e unico bandera cu ta conta ta e bandera di  Aruba. Si tur parlamentario actua y pensa mesun cos nos lo por logra un parlamento di nivel halto cu berdaderamente ta controla gobierno y cu esey bo ta logra proteha bo Trias Politica.

Den gobierno berd’e ta kiermeen cu bo mester ta berde pa bo haya tereno, trabao, proyectonan paso si bo no ta berde no tin nada pabo. Como rubiano professional cu a studia duro pa logra yega unda mi ta awe e ta frustrante y e ta dunabo un sabor amargo pa wak personanan sin ningun educashon bira cordinador, haya puestonan halto, haya terenonan na cantidad djies paso Berd’e ta!. Si bo no ta berde bo no ta conta. Hopi ta e hobennan cu mi ta papia cu nan cu ta bisami con inhusto e ta cu nan ta mihor cualifica y tin mas experienca cu hopi otronan cu ta haya trabao, pero paso nan famia ta di un otro color politico nan ta worde nenga trabao. Anto despues bo kier puntra bo mes pakico nos yiunan di tera no ta bolbe Aruba. Un otro problema grandi ta cu cada 4 of 8 aña cu cambio di gobierno ta bin un persecucion politico formal. Ami a pasa aden, dus mi sa di kico mi ta papia. Gobierno ta cambia, nan ta pone tur nan hendenan den posishonan clave y manda tu hende di otro color cas cual ta crea un overtolligheidspool grandisimo y ineficiencia den varios departamento paso bo ta kita bon hendenan cu experiencia foi trabao djies paso nan no ta berde of geel. Nos a bin ta vocifera cu mester para e cantidad di coordinadornan, cuminsa usa bo expertonan cu bo tin inhouse. Mester stop e discriminashon di nos mesun hende pavia di nan color politico, mester para persecushon politico, mester duna balor na cada persona paso nos tur ta rubiano. E cuenta cu Berde bo mester ta pa conta mester caba.

E slogan Berd’e ta ta disciminatorio, exclusivo y ta crea desunion y desigualdad den nos mesun hendenan. Nos no a nace berde, geel, blauw, binja, bruin. Nos tur ta biba riba Aruba  y nos tur tin mesun derecho y nos tur mester tin e bienestar di nos pais na prome lugar y nunca e bienestar di nos color politico prome.

 

- Advertisement -

1 COMMENT

DUNA COMENTARIO

Please enter your comment!
Please enter your name here