Home General Masacre riba caya y un pronostico di casi 90 porciento di abstencion...

Masacre riba caya y un pronostico di casi 90 porciento di abstencion na Venezuela

1677
0
SHARE
- Advertisement -

ORANJESTAD (AAN) – Manera ta conoci, diadomingo e pueblo di Venezuela mester a presenta na e urnanan electoral pa vota pa e Constituyente crea pa e presidente Nicolas Maduro.

E pueblo Venezolano local (no tabata tin votacion den exterior) a wordo convoca pa elegi e 545 miembronan di e Asamblea Constituyente proponi pa Nicolas Maduro, den un proceso polemico rechaza pa e oposicion. Oposicion a haci un yamada na abstencion. E eleccion aki a tuma lugar dos siman despues cu mas di 7 miyon di Venezolano a rechaza e Constituyente durante un yamada nacional como tambe den exterior.

Masacre:

Ya den oranan di madruga caba NTN a emiti e noticia cu tabata tin cuater persona morto, den un enfrentamento cu e Forzanan Arma y e manifestantenan contra e Constituyente. Nan tabata papia di un situacion caotico, no obstante Gobierno Venezolano, Maduro mes, a ignora esaki, bisando cu e votacion tabata bayendo den un ambiente trankil, cu no a registra ningun incidente.

Mientras tanto den e Estado Sucre, e hoben Ricardo Campos a muri door di un disparo di polis. E hoben tabata Secretario Hubenil di Accion Democratica y el a wordo mata den cercania di su mes cas.

Un proceso electoral cu oposicion a destaca como un convocatorio iregular, y nan a pidi e pueblo Venezolano pa subi e cayanan di Caracas, y tuma e autopista Francisco Fajardo, den e ciudad. Pero den e interior di e pais tambe a haci un yamada, entre otro door di e Gobernador di Estado Miranda Henrique Capriles, como tambe Leopoldo Lopez, for di su cas unda e ta reclui como carcel.

For di 6 or di mainta e votacion a cuminza meymey di actonan sangriento di violencia. Segun  rapportnan di prensa digital, publica prome cu 7:30 pm (ora Aruba) tin un saldo di 16 persona asesina den curso di e ultimo 24 oranan durante e protestanan contra e Constituyente.

Mientras tanto, e votacion cu mester a cera pa 6 or di atardi Nicolas Maduro a anuncia su extension pa un ora mas, pero datonan preliminar tabata indica cu menos di dos miyon di Venezolano a presenta na e urnanan electoral.

E Alianza opositor Mesa di Unidad Democratico (MUD) a calcula cu solamente 9 porciento di e Venezolanonan cu derecho di voto a presenta na e urnanan electoral, pa elegi e integrantenan di e Asamblea Nacional Constituyente. Asina e diputado sra. Delsa Solorzano, di MUD, a informa banda di 3 or di atardi (ora Venezuela). Como 15 porciento di e participantenan a emiti voto nulo, y esaki e ta atribui na e empleadonan publico cu a sinti nan mes obliga di acudi na e proceso fraudulento aki. En total MUD ta calcula un 90 porciento di abstencion.

Encuanto e opinion internacional, paisnan manera Colombia, Argentina Mexico, Peru, Costa Rica, Merca, a declara cu nan lo no reconoce e Asamblea Constituyente di Nicolas Maduro.

E gobierno di Colombia, di su parti a otorga un permiso special na e Venezolanonan pa pasa e frontera pa cumpra alimentonan. Na e momentonan aki Venezuela ta carece di practicamente tur producto esencial y remedi. Un situacion caotico, sin duda algun.

Prome pronunciamento di Merca:

Sra. Nikki Haley, embahador di Merca na ONU a expresa: “ E eleccion di e Constituyente na Venezuela, ta un stap mas na dictadura, y Merca lo no acepta un gobierno ilegitimo na Caracas”. Esaki ta e prome contesta oficial di Washington tocante e proceso electoral na Venezuela diadomingo.

Potretnan: AFP

 

 

 

 

- Advertisement -

DUNA COMENTARIO

Please enter your comment!
Please enter your name here