Home Politica MEP ta anuncia: Noord lo haya su scol di MAVO/HAVO/VWO

MEP ta anuncia: Noord lo haya su scol di MAVO/HAVO/VWO

224
0
SHARE
- Advertisement -

ORANJESTAD     (AAN):   Pa conoce e preocupacionnan cu ta biba den henter un comunidad, ta necesario tambe pa politiconan drenta barionan y bishita mas casnan posibel pa asina nos por sa kico realmente ta e inkietudnan di nos pueblo.

Partido MEP un partido cu aña den aña afo ta keda mantene contacto cu pueblo sea bishitando esnan den necesidad, esnan cu ta yama nos pa un of otro motibo y tambe esnan cu ta acerca partido na nos CEDE na Santa Cruz cu varios problema pero especialmente di belasting.

Sinembargo, como custumber di campaña electoral, candidatonan di Partido MEP ta drenta districtonan y bishita cas pa cas hibando nos mensahe cu nos tin e plan pa cambio cu nos pueblo tin mester y merece.

Den fin di siman Lider di Partido MEP, sra Evelyn Wever-Croes hunto cu candidatonan y sostenedornan a drenta den un forma masal den barionan di Noord. Nos a scucha y tuma nota di cada preocupacion cu ta biba den cada hogar.

Ciudadanonan di Noord ta pidi pa un cambio. Hendenan cu ta expresa cu ya nos no ta bibando den un Aruba di antes na unda cu por a biba trankil cu porta y bentana habri. Aruba mester un cambio completo riba e tereno di siguridad y criminalidad. Pa MEP e preocupacion aki lo wordo atendi mesora cu pueblo duna nos sosten y permiti nos goberna e proximo 4 añanan. Nos lo trece orden y respet bek cu a wordo perdi durante e ultimo 8 añanan cu a pasa pa Aruba

Habitantenan di Noord a mustra nan indignacion cu despues di 8 aña ainda e gobierno di AVP no a construi e HAVO/VWO scol cu Gabinete Oduber a laga tur plan y financiamento cla atras na 2009. Pa Partido MEP esaki ta un prioridad, mirando cu esaki lo alivia e problematica cu tin actual cu no tin cupo na scol di MAVO pa cierto cantidad di estudiante. MEP lo construi e scol di MAVO/HAVO/VWO na Noord.

Noord a ricibi nan den gran forma. Hopi chauffeur cu tabata pasa den nan auto a baha for di caminda pa saluda nos lider y demas candidatonan.

MEP su prioridad cu Aruba ta pa pone e hende central atrobe. Hunto nos lo logra esaki. MEP lo ta drentando tur skina di Aruba den e ultimo dos lunanan aki prome cu eleccion cu nos mensahe di cambio. Aruba, Hunto p’e cambio!

- Advertisement -

DUNA COMENTARIO

Please enter your comment!
Please enter your name here