Home Politica Michella Lacle di POR notando con Gobierno kier tapa solo cu un...

Michella Lacle di POR notando con Gobierno kier tapa solo cu un dede

61
0
SHARE
- Advertisement -

ORANJESTAD (AAN): Michella Steenvoorde- Laclé di partido POR a mustra cu recien e tabata invitado na un emisora, pa duna su opinion riba e declaracion haci pa Directora di SKOA tocante posible apertura di un Dependance di Maria College MAVO.

Hunto cune na e emisora a worde invita Señora Evelyn Wever-Croes lider di Partido MEP, y Sr. Baba Herde fractievoorzitter di partido AVP.

Primeramente Michella kier a declara cu e ta contento cu ambos partido ainda tin construccion di un Mavo/Havo/VWO na Noord riba nan programa. Ambos persona a declara esey.

Loke si ta di lamenta cu 30 aña pasa caba SPCOA kier a habri un Mavo/Havo/Vwo na Noord y a worde wanta na liña door di e minister di enseñansa e tempo ey. SPCOA a perde 80.000 Florin na opcion di tereno (placa cu nunca nan a haya back) pa despues Land Aruba dicidi cu nan mes lo habri un openbare Mavo/Havo/Vwo na Noord.

Por argumenta cu Land Aruba tabata desea pa e school ta accecibel pa un y tur, independiente di nan religion.

Consecuentemente, na aña 2005 Drs. Marisol lopez-Tromp a tuma e cartera di enseñansa over, y mesora a cuminsa cu estudionan y planificacion pa e school publico Mavo/Havo/Vwo. Y na aña 2009 a haya aprobacion pa fondonan di Hulanda pa construccion di e school. Contra biento y marea, Drs. Marisol Lopez-Tromp a laga mapa, tereno y placa presupuesta 16 million Florin, pa construccion di e school, anticipando e necesidad pa e pueblo creciente. Pero e gobierno di MEP a perde eleccion.

Ora AVP a bin na mando, nan a mira desaroyo di caya grandi como prioridad y a realoca e 16 million aki pa enbeyesimento di caya grandi y nan a priminti cu despues di esey e school lo haya su turno.

Na 6 di Juni 2011, OV #26 Motie #1 MEP a pidi pa medio di un mocion den parlamento, pa pone un paro na e proyecto di tram pa realoca e placa pa construccion di un Mavo/Havo/Vwo na Noord. Dicho mocion, a worde desaproba pa henter e fraccion di AVP incluyendo parlamentaria independiente Drs. Marisol Lopez-Tromp, paso na e momento ey ya e realocacion di placa pa e proyecto di caya grandi a worde aproba pa Hulanda, pues e mocion no tabata tin sentido.

Sinembargo den su calidad como parlamentario riba 3 di April 2014, Drs. Marisol Lopez-Tromp a keda presiona ministerio di Enseñansa pa medio di preguntanan den paralamento, pa trece claridad den ki dia e Mavo/Havo/VWO na NOORD lo yega na turno.

Te dia 6 di Mei 2015, den OV#24, Motie #13, OLV # 812, e mocion a worde aproba pa tur 21 parlamentario. Cos cu no sa pasa hopi biaha. Pa cuminsa cu preparacionan pa construccion di e Mavo/Havo/VWO na NOORD. E minster di enseñansa a duna su palabra cu no mas tarda 2016 lo cuminsa cu construccion di e school.

Awe na aña 2017, nos por mira back den pasado, na promesanan bashi. Na un politica bieu cu pueblo lo rechasa 22 di September venidero. Un politica cu door di polarisacion y weganan politico infantil, ta stop proyecto di otronan, simplemente pasobra nan ta bin di un otro partido.

Desde Censo di 2010 tin fuerte indicacionan cu mas o menos 164 hoben cu ta biba na NOORD ta haya un Mavo advies pa aña. Cifrasnan cu por sierto ambos, Evelyn Wever-Croes ni Baba Herde no conose, algo cu nan mes a admiti durante e encuentro na Power FM.  Nos pueblo su populacion a redobla, nos no ta 60.000 habitante mas, nos ta yegando 120.000. E nececidad di mas kleuter ta bibo, e nececidad di mas Mavo ta bibo. Declaracionan di directora di SKOA ta indica cu 190 hoben e aña aki no tin un Mavo pa drenta, ta premira cu otro aña e cifra ta mas halto 220 mucha. Y ainda no a papia di e e cantidad di muchanan cu no ta hayando lugar na un kleuter. Tur esakinan ta cosnan cu por a worde premira, y planea, si nos Parlamento e organo di mas halto di nos pais, tabata haci nan trabao manera debe ser.

Pa mas di 30 aña e desaroyo social di nos pais no a bay man den man cu e gran desaroyo economico cu nos conoce awe. Pesey, hunto cu POR, lo crea un Plan National di Reforma Social.  Un plan inclusivo y pragmatico atravez di concientisacion national y programanan di enseñansa pa grandi y chikito.

E retonan den nos sociedad ta grandi y ta afecta e calidad di bida di cada un di nos hendenan. Como tal, mester atende esakinan cu precision y tacto a base di estudionan profundo riba problemanan social reinando den nos pais. Un sociedad den harmonia cu economia, mester POR!

 

- Advertisement -

DUNA COMENTARIO

Please enter your comment!
Please enter your name here