Home Cultura Negociacionnan Canal di Panama a partir di triunfo Jimmy Carter

Negociacionnan Canal di Panama a partir di triunfo Jimmy Carter

33
0
SHARE
- Advertisement -

Cerca di conmemora 40 aniversario firma di Tratadonan Torrijos-Carter

ORANJESTAD (AAN) — Omar Torrijos- Herrera: “E Gobiernonan cu ta siña di historia, no ta insisti den landa contra coriente…”

Matutino DIARIO en colaboracion cu Fundacion Torrijos-Herrra, y su director Lic. Guillermo Villalobos Sole, ta sigui awe cu un resumen di e historia di e Tratadonan Torrijos-Carter, basa riba e historiador Omar Jaen Suarez.

E autor ta nara cu despues di e triunfo di Jimmy Carter como Presidente di Merca, dia 2 di November 1976, e posibilidad concreto di finaliza pronto y exitosamente e negociacionnan riba e Canal di Panama, a wordo habri.

Carter ta reconoce e situacion di America Latina y e tema di e Canal di Panama, for di tempo cu e tabata Gobernador di Georgia, y a forma parti di e famoso Comision Trilateral, interesa den e politica exterior di Merca.

E Comision a wordo lanta pa David Rockefeller na 1973, y a consisti di 180 personalidad di e paisnan desaroya, specialmente di Merca mes, entre nan el a recluta un parti hopi apreciable di su colaboradornan mas importante, manera vicepresidente Walter Mondale, Su Secretario di Estado Cyrus Vance, Zbigniew Brezinski, Consehero di Seguridad; Harold Brown, Secretario di Defensa y Sol Linowits, su negociador pa e Tratadonan cu Panama.

“Ademas, Carter tin un vision etico encuanto e relacionnan internacional y un compromiso moral di husticia den e trato cu otro paisnan. Como consecuencia, a facilita faborece un acuerdo cu Panama, specialmente despues cu e militarnan di e Pentagono a yega na e conclusion cu pa defende un Canal, lo mester a busca centenares di soldat y somete nan na e hostilidad Panameño y Latinoamericano. Asina aki Carter tabata dispuesto caba pa duna e impulso final na e negociacion aki, cu tabata languidece.

Bao di e perspectivanan di mas halagado di parti di e gobierno nobo di Merca, dia 10 di December 1976, e Canciyer Aquilino Boyd a reuni na Washington cu e secretario di estado saliente Henry Kissinger y a dicidi pa reanuda e combersacionnan. Un rond importante a keda celebra na Contadora di dia 13 te 19 di December, sigui pa otro encuentronan na Washington di 11 pa 15 di Januari, 1977, specialmente na mesa di “tierras, aguas y administracion di e Canal, den e Pentagono.

Den e grupo di negociador tabata tambe e autor di e relato historico aki Omar Jaen Suarez.

Ora cu Presidente Carter a asumi e poder, dia 20 di Januari di 1977, el a nombra e Hurista y diplomatico Cyrus Vance como Secretario di Estado y a adopta, dia 21 di Januari, den su prome acto decisivo riba asuntonan internacional, e memorandum mediante cual e ta ordena revisa e politica di Merca pa cu Panama, y en particular, e ta cambia e directivanan presidencial vigente for di 18 di Augustus 1975, cu e animo di logra rapidamente, un acuerdo aceptable pa ambos parti. Carter a designa, for di 8 di Februari,  e Hurista y Diplomatico, ademas di gran ehecutivo Sol Linowitz como co-negociador manteniendo den e cargo di negociado principal, Ellsworth Bunker.

Mientras tanto, Panama a reahusta tambe su fichanan prome cu e delaster asalto den e negociacionnan largo aki. Dia 9 di Februari, na su regreso di Washington y di su reunionnan cu e Secretario Vance y miembronan di e Congreso, e Canciyer Boyd, di hecho hefe negociado Panameño, a wordo pusha pa renuncia y duna paso na e hurista y politico di izquierda Romulo Escobar Bethancourt, ken a bira di eynan pa dilanti e hefe negociado, contraparte di Bunker. E General Torrijos a asumi den practica e Hefatura superior di e politica exterior y den henter e proceso negociado di parti di Panama.

Den e siguiente articulo otro siman, lo referi na General Omar Torrijos-Herrera y con el a maneha e resto di e negociacion te final.

Nos ta gradici Lic. Guillermo Villalobos Sole pa su aporte pa e historia aki bira conoci na Aruba, door di e importancia cu pa nos economia e Canal di Panama, awe amplia, tin.

Omar Torrijos- Herrera: “ley ta mas husto entre mas cerca e ta di hende”!

- Advertisement -

DUNA COMENTARIO

Please enter your comment!
Please enter your name here