Home Politica Otmar Oduber di POR mustrando pueblo preocupa pa cu debe di proyectonan...

Otmar Oduber di POR mustrando pueblo preocupa pa cu debe di proyectonan PPP

69
1
SHARE
- Advertisement -

ORANJESTAD (AAN): Segun Otmar Oduber di Partido POR, un topico cu ainda no ta hayando atencion na nivel di e proximo gobierno (despues di september 22) ta, discusion y preocupacion cu tin den comunidad  pa loke ta e debe cu Pais Aruba tin y e debe cu Pais Aruba no sa cu e tin. Debenan cual no tin un bista exacto di dje y tampoco tin solucion pa e debenan nobo cu ainda Pais Aruba mes ta entama continuamente.

Den e ultimo simannan aki ta mira cu gobierno ta haciendo esfuerso hopi grandi pa propaganda y mustra diferente proyecto cu ta andando. Den e caso aki ta papiando di Ringweg Watty Vos, Green Corridor y Hospital entre otro cu ta 3 proyecto PPP cu ta costa total rond di 700 – 800 miyon Florin.

Practicamente full e suma ta fia, kiermen no ta un placa cu pueblo di Aruba of gobierno di Aruba tin, sino cu ta te otro aña na 2018 ta cuminsa paga esaki pa e proximo 20 – 25 añanan. Pues un gobierno cu dia 22 di september pueblo lo mester dicidi si e ta keda of no ta keda den gobernacion, ta pronkia cu un cantidad di proyecto cu e gobierno cu ta sinta aworaki no a paga ni un cen pe ainda.

Desde otro aña lo mester cuminsa paga tanto pa e proyecto di Green Corridor como tambe hospital pa un suma di alrededor di 55 miyon Florin y despues pa final di aña 2019 lo mester cuminsa paga un suma adicional di 20 miyon cu ta suma na riba 70 miyon Florin cu tincu bay worde paga pa aña pa e proximo 20 – 25 añanan na e tres proyectonan aki so. sin conta tur e preocupacion cu awe ta biba cerca un CFT, ATIA y FTA entre otro, instancianan cu poco poco a cuminsa sali papia y realisa cu tin un discusion cu no ta worde hiba na e momentonan aki riba loke ta trata finanzas publico di Pais Aruba.

“Goberna na momentonan dificil ta demostra e capacidad cu bo tin, cualkier hende por goberna den momentonan di abundancia”, esaki, ta algo cu mi colega Andin Bikker a trece dilanti na diferente ocasion. Segun lider di POR Otmar Oduber: ‘Tempo cu mi a bay gobernador mi a sinti cu tabata merece e atencion na e aspecto financiero particularmente, mirando cu tabata proyecta proyectonan cu no tabatin placa pa paga e momentonan ey. Sinembargo a mira cu esakinan a continua.

E proyectonan ta bunita y ta embeyece Aruba y ta yuda den infrastructura definitivamente di Pais Aruba, pero ta proyectonan cu na e momentonan aki no tin placa pa por paga esaki si no bin cu un plan di restauracion financiero economico di Pais Aruba pa por cuminsa paga esaki otro aña.’

Nos partido kier haci esaki un punto di discusion y ta spera tambe cu gobierno/Parlamento por ta transparente cu comunidad di Aruba pa pueblo por realisa despues di 22 di september kico ta speranan pa e añanan nos dilanti cual sumanan no ta den e presupuesto actual.

 

- Advertisement -

1 COMMENT

  1. Pa mi por traha mi cas , mi mester a fia sen for di Banco. E sen aki ta tuma mi 20 anja pa mi paga mi Hypoteca, wel Aruba mi ta wak e tambe como un cas grandi na unda hopi famia ta biba i pa construe nos mester fia sen pa restaura cosnan cu gobierno anterior no a drecha. Mi no takere cu Otmar/Adin/Marisol i e resto di blas kaaknan di Mep ta traha nan cas sin fia sen for di Banco i si ta asina mi tin gana di sa for cua mata nan ta plug. Cu otro palabra Si bo kier mira cambio den bo cas bo mester durf di tuma stapnan asina , mi no ta kere cu bo kier keda biba den un “CAS DI PALO DAK DI ZIN” si bo ta compronde kiko mi kiermen. Dus nada robez !! Aruba kier mira cambio Mi ta spera cu e partido nobo aki no ta manera e partidonan conversionalnan?. Cu Gabinete 1 i 2 nos a mira cambio cu nunca nos a mira anteriormente.

DUNA COMENTARIO

Please enter your comment!
Please enter your name here