Home Remitido Pakico ta tira culpa di criminalidad riba stranheronan

Pakico ta tira culpa di criminalidad riba stranheronan

29
0
SHARE
- Advertisement -

Remitido

“Na mi compatriota nobo.  Cuidao por fabor y sea alerta.”  Conclusion despues di dos debate politico: Segun MEP, POR, UPP, PPA, MAS, “e culpablenan di tur criminalidad na Aruba ta e stranheronan”.

AVP, ABO, y Curpa a distancia nan mes di tanto repudio di e otro partidonan contra stranheronan na Aruba.

E Pruebanan:

No ta pasa un oportunidad cu e dos partidonan MEP y POR ( sosteni pa UPP.) ora cu nan ta toca e asunto di criminalidad na ARUBA cu nan ta presenta nan solucionnan pa e asunto nacional aki. E solucionnan y armanan di MEP y POR contra criminalidad ta entre otro : sera tur frontera di Aruba pa tur stranhero , bini cu mas radar, haci kustwacht mas active y agresivo, arma Strandpolitie cu mas boto/equipo etc., amplia IASA, haci Guarda nos Costa cu nan tratonan inhumano activo atrobe, implementa modelo Suizo (3 aña traha na Aruba y despues FUERA), pone 200 polis den pura riba caya, un maneho strak (dictatorial) di polis/gobierno , castigo minimo, combati ilegalidad cu tur medio y extreme inhumano maske cu no ta culpa di e residente stranhero. (Un forma di actua cu por worde compara cu e mannan di sanger di e presidente actual di Filipinas Duterte.)

Para xenophobia:

E rabia y repugnancia  cu e representantenan di MEP y POR e.o. Evelyn Wever-Croes, Otmar Oduber, Andin Bikker na e debatenan y otro ocasionnan a demostra ta inhumano, incorecto, detestable, y mester worde para di inmediato. Culpa e hendenan di exterior residencia na Aruba di ta e malhechornan di tur maldad y criminalidad na Aruba ta inhusto.

Esnan di MEP y POR cu ta insuando esaki ta creando un division, polarisacion y discriminacion na Aruba cu solamente lo ta negativo y desastroso pa e pais. E solucion di Evelyn , Otmar y Andin, e.o ta asina peligroso, antigua,  y cruel pasobra e ta mesun manera di pensa y doctrina cu e pensamento politico fascista/nazista cu a worde  implementa den añanan 30 y 40 di siglo pasa na por ehempel Alemania.

O sea den doctrina di e dictadornan di e tempo ey pa tur problema y dilemma tin un culpable y un solucion facil. Na Alemania tur cos malo tabata culpa di hudiunan y e solucion tabata facil esta caba cu tur. Awendia na Hulanda , Francia e.o. tin e “ nacionalistanan” manera Wilders, Le Penn  cu ta duna tur culpa di tur criminalidad na e stranheronan mescos cu MEP y POR ta dunando  tur e culpanan di criminalidad na e stranhero na Aruba cu maneho/solucion cu nan a presenta.

Problema compleho:

Criminalidad ta un dilemma hopi dificil. Esun cu bisa cu nan cu nan tin un solucion rapido o e no sa di kico e ta papia , o e no ta normal, o kisas entoxica(droga). Pesey e diferencia grandi di compronde, enfrenta y con pa soluciona  criminalidad a keda claramente demostra.  AVP den e prome debate a mustra corectamente riba con compleho e problema di criminalidad ta. Banda di tin un maneho represivo e enfoke solucionnan di berdad  ta : drecha e condicionnan di bida di e hendenan( mihor onderstand, kindertoeslag, hisa minimumloon etc.), traha barionan saludable pa nos hobennan por desaroya sanamente (Plan Bo Bario), duna maximo contenido y valor na enseñanza (traha y renoba schoolnan, bon lesnan, etc.), zorg pa tin e guianan necesario pa e mayornan y jovennan, renoba y biba segun e norma y balornan cu a haci Aruba su hendenan asina grandi y respeta, restablece respet pa autoridad den tur forma, etc., etc.

Pues AVP. a enfatisa riba e complehidad y magnitud de problema cu tur sinceridad pa ningun pais ta facil pa resolve. Pero un quick-fix manera MEP y POR ta sugeri ta demostra cu nan no  compronde e profundidad di problema criminalidad. Y cu respet na partido ABO cual cu hombreza a señala cu criminalidad na Aruba ta pa parti “ HOMEMADE”.

O sea un parti grandi di criminalidad ta nos mes hendenan ta ocasiona y culpable. Un berdad cu hopi tin problema y berguensa .Tambe partido CURPA a mustra riba e importancia di loke nan a yama “ spiritualidad” refiriendo na e necesidad di renobacion di nos norma y balornan, especialmente bou di nos hoben/millenians.  Kiermeen ora cu MEP y POR kier combati criminalidad cu discriminacion, polarizacion, racismo contra e stranheronan,  danki DIOS cu AVP y un par di otronan ta bay soluciona criminalidad cu un vision humano y social caminda tur conciudadano di e pida baranca Aruba den harmonia, union, poniendo semper E ser humano y Nos Creador central.

 

Duke Croes.

- Advertisement -

DUNA COMENTARIO

Please enter your comment!
Please enter your name here