Home Politica POR lo stimula aumento salario minimo y elimina impuesto innecesario

POR lo stimula aumento salario minimo y elimina impuesto innecesario

19
0
SHARE
- Advertisement -

Parlamentario Andin Bikker:

ORANJESTAD (AAN) – Den conferencia di prensa di Partido POR, Plataforma e Forza Nobo, Parlamentario mr. Andin Bikker a señala, cu POR ta bay stimula aumento di salario minimo y ta bay elimina impuestonan anticua y innecesario manera belasting di sucesion.

ESTIMULO SALARIO MINIMO:

Bikker a menciona cu normalmente ora di papia di salario minimo, ta bay Departamento Social Economico pa un ronda di consulta, y despues di basta intercambio, “across the board” gobierno, basicamente, ta impone salario minimo. Esaki por wordo evalua sigur, segun Bikker, pero e tin su aspectonan di inflacion. No obstante, tin otro dimension y solucionnan hibrido cu, en todo caso, POR ta pensa riba dje.

Kico ta e esencia di un salario minimo?

Bikker a splica cu un salario minimo ta un “entry level income”. Pues ta suppose di ta un salario cu bo ta haya ora bo ta cuminza traha jong-jong.

ESTIMULO RIBA WINSTBELASTING:

Bikker a señala cu e esencia di salario minimo e ta nifica cu asina e trahador mester sigui gane pa decadanan largo.

“Anto nos a pensa cu aworaki bo ta pagando 25 porciento di winstbelastig, across the board. Nos ta pensa cu si bo stimula cu e personanan doño di empresa cu por demostra na gobierno y na servicio di impuesto cu nan payroll nan a duna aumento riba e salario minimo, na nan empleadonan, cu nan lo wordo stimula door di duna nan un tasa di winstbelasting mas abao”, e politico a subraya.

El a menciona e ehemplonan di 20 of 23 porciento. E meta ta pa duna nan e escogencia pasobra nan sa con nan ta opera nan negoshi y kico nan presupuesto ta. Pero por duna nan estimulo fiscal pa nan aumenta di nan propio boluntad, e salario minimo den nan empresa, pasobra e mira di berdad locual enberdad e ta: un salario pa cuminza cune pero cu ta suppose di sigui crece, y bandone despues cu e persona traha mas aña, cu e ta duna un servicio, e ta perform y brinda bon servicio como empleado.

ELIMINA BELASTING DI SUCESION:

Un di e impuestonan aki ta e impuesto riba herencia. Bikker ta puntra pakico un persona henter su bida a paga inkomstenbelasting, Groundbelasting, Erfpacht Canon, y tur sorto di belasting y ora e persona cera su wowonan diripiente su herederonan tin cu paga impuesto riba loke nan a hereda. Esaki den concepto di POR no ta husto, y e propio Dialogo Social a demostra cu e impuesto aki ta anticua y ta costa mas hopi biaha pa bo mantene y cobra e belasting aki cu loke e ta trece na entradanan, segun mr. Andin Bikker.

E recomendacion a bin for di hopi tempo caba pa elimina e belasting aki, Bikker a agrega. El a splica tambe cu hopi hende no ta realiza cu ora un hende fayece, hopi biaha su herederonan ta haya cosnan cu no ta likidez.

Nan ta hereda, por ehemplo, un cas of un tereno, pero rara vez un cheque cu nan por paga cune servicio di belasting. Pesey hopi biaha e herederonan mester saca placa for di unda nan no tin, pa nan bay paga e belasting riba e herencia. Eliminando e impuesto aki, e suma cu nan lo a bay paga ta circula den nos economia y eynan e ta haya un poder di compra adicional. Bikker a conclui bisando cu pueblo por conta cu tur e belastingnan aki, fuera di e reformanan fiscal.

- Advertisement -

DUNA COMENTARIO

Please enter your comment!
Please enter your name here