Pueblo completo por conoce desaroyo di Aruba y aporta na su futuro via boaruba.aw

    61
    0
    SHARE
    - Advertisement -

    ORANJESTAD(AAN)–  – Dialuna mainta Prome Minister Mike Eman den presencia di Minister di Infrastructura Benny Sevinger a anuncia e lansamento di e website yama: boaruba.aw cu ta habri tambe si ta pone e extension ‘.com’. E plataforma di informacion digital ta combina cu salanan di exposicion fiho na Oranjestad y San Nicolas, como tambe ambulante na sedenan di MFA rond di Aruba cu ta inicia dia 1 di augustus proximo.

    E obhetivo tras di e iniciativa aki, manera Minister President Eman a splica, “ta pa haci posibel cu comunidad ta participe den e desaroyo di nos pais, tanto pa continua dunando informacion riba desaroyonan cu ta andando, pero tambe pa capta e idea y pensamentonan di nos conciudadano riba e futuro desaroyo di Aruba.”

    E prome sala ta ubica na ex local di Acme Store na Columbustraat dilanti di Plasa Nikki Habibe. Lo bin otro na San Nicolas, probablemente na sede di e edificio restaura di Nicolaas Store. Otro exposicionnan temporal lo pasa door di e diferente sedenan di MFA manera Noord, Paradera y Savaneta cu lo habri pronto. Aki ta dispone di salanan sumamente activo di ciudadanonan cu ta yega y ta duna un gran oportunidad pa expone e proyectonan importante di Pais Aruba. Asina ta informa comunidad di e vision nan tras y unda nan ta hiba nos.

    “Den e salanan y virtualmente, pueblo Arubano por haya un idea di e vision cu Gobierno tin no unicamente pa loke nos a desaroya caba, pero tambe pa loke nos ta visualisa pa futuro,” Prome Minister Eman a splica. Den henter e proceso aki, e mandatario ta spera di por haya hopi reaccion, idea y pensamento di e conciudadanonan bisando, por ehempel, cu por pone mas atencion riba algo of si a pensa riba esun otro.

    No tin limite pa e temanan cu por trece dilanti. Por opina riba renobacion di nos barionan, sostenibilidad, reconocemento di nos propio identidad, nos monumentonan, nos hobennan, nos naturalesa, etc. “Henter e vision total di un Aruba sostenibel tecnologicamente, ecologicamente, social-economicamente, tur ta bay keda presente den e sala aki y den otro salanan. Tur esaki ta forma parti di e miho manera pa laga pueblo participa den e desaroyo y duna nan pensamento pa futuro,” Premier Eman a declara.

    E ta gradici Oficina di Innovacion y Ministerio di Infrastructura cu ta haci hopi di e proyectonan aki. “E ta un vision grandi cu ta worde realisa tur dia. Bo ta wak e den bo bario; si bo no wak e na luz, bo ta wak e na caretera, bo ta wak e na e schoolnan cu ta worde renoba, of bo ta wak e na e MFA. Tambe bo ta wak e riba bo payslip na e Repartietoeslag, na e Schoolkinderentoeslag, na un aumento di pension of na e aumento di salario minimo. Den tur forma e vision aki ta pa trece felicidad den cada hogar di nos ciudadanonan y cu trabao duro nos ta haciendo e posibel, pero nos kier pa nos comunidad participa continuamente den e desaroyo y pesey e salanan aki di encuentro tur rond di Aruba.”

     

    - Advertisement -

    DUNA COMENTARIO

    Please enter your comment!
    Please enter your name here