Home Politica San Nicolas merece un bibliotheek cu funcionamento y proposito moderno

San Nicolas merece un bibliotheek cu funcionamento y proposito moderno

24
0
SHARE
- Advertisement -

Curtis Fraser (POR):

ORANJESTAD    (AAN):    E bibliotheek na San Nicolas tin basta aña cu funcionamento minimo, ya no ta mira muchanan di scol trahando groepsproject of usando computer pa studia un tema.

Den nos bida moderno unda tin hopi distraccionan den e omgeving di e hoben, un bibliotheek ta e lugar apropia pa scapa y cumpli cu bo debernan [escolar].

Pa es motibo mi ta hasi un suplica na Gobierno pa trata nos Bibliotheek manera un prioridad y pone e trabounan cana mihor pa nos no bolbe topa cu un bibliotheek sera otro aña escolar.

Aunke e topico di bibliotheek na San Nicolas tin un nubia negativo pa basta aña caba e ta den mi character pa toch semper busca lo positivo den tur cos y trece pa dilanti.

E positivo ta cu e gobierno tin un oportunidad pa duna comunidad di Pariba un bibliotheek moderno cu por sirbi e necesidadnan actual di nos pueblo. Esaki lo beneficia nos muchanan di scol y henter comunidad.

E rol principal di un bibliotheek a cambia, e ta mucho menos over di accesibilidad na bukinan y mas over di duna acceso na informacion y servicionan cu ta stimula intercambio di conocemento.

Un bibliotheek mester bira un lugar unda studiantenan y comunidad por bay pa, entre otro, usa computer cu e bibliotheek tin disponibel, huur aparatonan (p.e. un tablet), usa wifi cu propio aparato, usa espacio designa pa traha riba groepsproject, ricibi infomacion over di con por tuma parti den iniciativanan di comunidad (Community Center), tin accesso na bukinan digital, y fia buki.

Servicionan manera ayudo cu Prezi, Microsoft Office (PowerPoint, Word, etc), y otro programanan cu ta wordo usa cu frecuencia ta algo cu bo ta encontra na bibliotheeknan moderno rond mundo y ta un desaroyo cu nos kier mira den e planificacion pa e bibliotheek renoba na San Nicolas.

Nos bibliotheek por hasta introduci un Copy Shop cu lo yuda cu e gastonan halto di printing y copia cu mayornan ta encontra ora nan yiu tin proyecto di scol.

Pa muchanan di scol e Copy Shop por ofrece prijsnan social cu ta bira mas atractivo segun e cantidad di papel cu mester print subi.

Un gobierno di pueblo pa pueblo lo automaticamente tin esaki como un prioridad.

Comunidad tambe mester por usa e bibliotheek den dia, rond mundo tin “Community Gardens” na bibliotheek unda hende ta siña for di otro.

Comunidad por bishita e Community Garden cu tin su cantina, eynan por come, bebe y combersa mientras ta comparti informacion; e tipo di actividadnan aki ta un “meerwaarde” pa nos comunidad.

Por hasta bay asina lew pa inclui un “media room” cu su beamer unda por entre otro draai documentario y tene lectura; of cu por wordo uza pa companianan chikito cu no tin un vergaderzaal.

Esaki kiermen cu e espacio di un bibliotheek mester cambia for di uno cu mastanto ta ofrece espacio pa lesamento den silencio na uno cu diferente areanan cu ta ofrece actividadnan diverso; mas cu claro incluyendo un espacio pa lesa den silencio.

Mi ta spera di por celebra e desaroyonan aki hunto cu pueblo ora cu nos bibliotheek na San Nicolas habri bek pa comunidad.

- Advertisement -

DUNA COMENTARIO

Please enter your comment!
Please enter your name here