Home Deporte Sr.Benjamin Frances mester bin cerca mi pa mi siñe con pa maneha...

Sr.Benjamin Frances mester bin cerca mi pa mi siñe con pa maneha un Organisacion of Federacion

539
0
SHARE
- Advertisement -

ORANJESTAD (AAN): Dialuna atardi a tuma lugar un conferencia di Prensa yama pa Minister di Salubridad y Deporte Alex Schwengle, pa asina elabora riba e topico fastioso cu a tuma lugar den fin di siman, na unda cu comunidad di Aruba tabata hopi rabia pa mira algun mucha ta pidi placa canto di caminda pa asina nan bay representa pais Aruba den exterior. E situacion aki a pone cu comunidad di Aruba a cuminsa culpa Minister y Lotto pa Deporte di no a Sali pa yuda nos propio yiunan di tera. Hopi tabata e critica riba social media relaciona cu e topico aki. Dialuna atardi Minister Schwengle compaña pa director di Lotto pa Deporte, Presidente di ASU. Presidente di Subsidie Commisie y Sr.Karel “Cai Cai” Williams a set the record straight informando prensa presente kico enberdad ta tumando lugar. Un Minister Schwengle basta rabia, a cuminsa na elabora ken ta Sr.Benjamin Frances y ken tur ta para tras di Pony League. Minister a splica e diferencia entre Pony League y Little League. Mester compronde cu Pony League ta un liga full independiente / priva cu ta wordo maneha y financia riba nan mes y algun sponsor cu ta dicidi pa contribui cu e organisacion aki. Na ningun momento Gobierno tin e obligacion pa yuda Pony League, mirando cu nan no ta afilia na ASU, Subsidie Commisie y ningun departamento cu ta afilia cu maneho di deporte di Gobierno.

Gobierno na varios occasion a extende un invitacion pa Sr.Benjamin Frances y su grupo presenta na Gobierno pa asina delibera con nan por yega na otro pa asina yuda e organisacion, pero lastima mente esaki tabata envano. Minister Schwengle a sigui elabora riba e caso na unda cu e ta haya esaki hopi lamentable, mirando cu Sr. Benjamin Frances no ta Sali y bisa berdad di kico enrealiad ata tumando lugar, pero ta opta pa tilda Gobierno. Muy enparticular awo, cu Sr.Benjamin Frances a subi riba lista di CURPA. Awo e no ta solamente un persona cu tin un organisacion deportivo, pero awo oficialmente e ta un politico.

Minister di su turno a splica kico ta tur e rekisitonan pa bo bin na remarca pa ricibi un subsidio pa bo federacion. Ta basta rekisito mester tuma lugar y cu mester wordo entrega door di e federacion prome cu nan ricibi cualkier placa di Gobierno.

Apesar di e malpractica cu Sr.Benjamin Frances ta haci, Gobierno na varios occasion a saca un man pa yuda su persona, mirando cu na final di dia, e bienestar di cada mucha ta esun mas importante. Minister a splica, con sopresivamente nan a ricibi un peticion di Sr.Benjamin Frances pa yuda cu un suma di placa cuantioso  pa un campeonato International cu nan a organiza cu varios team di exterior. Pa nan sorpresa, Sr.Benjamin a invita varios team na Aruba, pero no tabata tin e capital di placa pa organiza e campeonato y pio pa paga tur e gastonan. Pa Pais Aruba no mustra malo y wordo bergonza  Internacionalmente, Gobierno di Aruba pa via di Lotto pa Deporte a saca un man y a paga e cambernan pa asina tur e muchanan por a haya un lugar pa sosega. Esey no ta e prome biaha cu Gobierno a yuda Sr.Benjamin Frances y su organisacion. Ta na varios occasion y awo TA BASTA.

Sr.Francis no ta kere cu e por haci y deshaci y ora cu e pega, e ta bin bati riba porta di Gobierno manera ta un banco Gobierno ta. Minister a splica con dia 7 di Juli 2017, su persona a ricibi un carta di Sr.Frances informando su persona di e World Series cu lo tuma lugar na Merca y si Gobierno por yuda cover e gasto. Minister a haya esaki un falta di respet, mirando cu na varios occasion a invita su persona pa sinta na mesa y na ningun rato e no por yega, pero awo cu e mester di placa, e sa e adress di oficina di Gobierno. Absolutamente cu cosnan no ta funciona asina. Si tur otro federacion por cumpli dignamente, e ora ey su persona tambe por.

Pa locual cu ta trata e situacion fastioso na e momento aki an unda cu un seleccion di Aruba mester bay representa Aruba den un World Series importante, Gobierno di Aruba den palabra di Minister Alex Schwengle a bisa cu nan ta dispuesto pa sinta na mesa y mira con leu nan por yega pa asina e muchanan no wordo perhudica. Pero esaki lo pasa solamente si Sr.Benjamin France sinta na mesa y cu nan yega na acuerdonan  fiho, pa asina situacion asina fastioso no pasa nunca mas. Tin mas cos cu a wordo papia durante e conferencia di prensa na unda cu Diario Deportivo tabata presente y a baha skerpi cu varios pregunta, pero nos lo continua esaki den nos siguiente edicion. Potret pa cortesia di: Michael Carty

- Advertisement -

DUNA COMENTARIO

Please enter your comment!
Please enter your name here