Home Comentario Tur hende den nos comunidad mester reflexiona riba declaracion di Directora di...

Tur hende den nos comunidad mester reflexiona riba declaracion di Directora di SKOA

28
0
SHARE
- Advertisement -

Comentario:

Pa Mercedes Monge

Mi a haya hopi honesto di sra. Jossette Daal, director di SKOA, acepta locual (esey ta mi impresion) mayoria di nos poblacion no kier mira stret: na Aruba tin hopi problema social.

El a confirma, practicamente, loke mi a trece dilanti den un comentario, a base di entrevistanan cu mi a yega di haci cu algun maestro, trahador social y ciudadano cu ta mira e situacion: hopi di nos mucha y hobennan ta bay scol carga, no solamente cu nan bulto escolar pero, cu yen di problema di cas.

Esaki e muchanan aki ta refleha na scol particularmente, pero tambe unda cu nan ta move bay. E tema aki ta hopi delicado y tin varios factor cu tin di haber cune. Y no necesariamente e tin di haber cu pobreza, manera un ciudadano a expresa na mi, via telefon. E ta hopi mas profundo cu esey, pasobra e ta mishi cu tur clase social den nos comunidad. Pobreza por ta un factor den cierto casonan, pero no ta e factor absoluto ni tur ora e ta presente tampoco.

E asunto di mal comportacion di mucha ta preocupa hopi mayor. Tin mayornan cu ta sinti hasta culpable pasobra un par di biaha nan ta wordo yama na scol debi cu su yiu a bira fresco cu e meneer of juffrouw of cu un compañerito di klas y nan ta sinti cu nan ta educa e yiunan bon, pero tin algo ta faya cu nan mes no por detecta.

No obstante, mi ta kere (sin intencion di huzga ningun mayor, ningun famia) cu aunke cada mucha tin su propio manera di ta, di sinti y di pensa, hopi biaha nan ta actua segun kico nan ta mira y kico nan ta scucha, kico nan ta siña di otronan, kico nan ta siña di nan propio cas.

Un maestro a comenta recientemente den un entrevista cu muchanan ta manera spons, tur cos nan ta absorba y lamentablemente, na Aruba tin hopi famia disfuncional.

Mi semper tin un expresion cu ta sali di mi mes consenshi “nos ni un ta e mayor perfecto, consecuentemente, nos no por lanta e yiu perfecto”.

Manera e dicho ta bisa ni un hende ta nace cu un buki bao di braza cu instruccion con pa ta un bon mayor, pero importante ta intenta, alomenos, di haci e mihor papel posible como mayor, maske cu no tur ora nos por logra.

Mi ta haya cu ta practicamente imposible, pa nos por tapa nos problemanan cu tin den cas, pa nos yiunan no sa di nada. Si e dificultad ta economico, di mes nan ta ripara ora cu tin algun carencia material. Importante ta pa sinta papia cu e muchanan/hoben, laga nan sa si ta cu papa of mami a keda sin trabao, y no desespera pero laga nan compronde cu tin un cambio di situacion y pakico y cu e famia mester siña biba cune, pero cu tin speranza grandi cu tur cos lo drecha.

Si e problema ta kibranto di salud di un mayor, con dificil e por ta e yiu tin derecho di sa kico e ta, ki expectativa tin, y kico por spera como desenlace si ta trata di un malesa grave cu un mayor, of e persona cu tine na su encargo ta confronta.

Mescos si ta problema di pareha, cu por caba den separacion of divorcio, e yiunan tin derecho di sa y e pakico na un manera honesto, y hopi importante pa nan sinti cu no ta nan falta y si e mayornan ta bay for di otro, nan no ta bay for di e yiu(nan).

Mi ta kere si, cu e problema mas grandi ta e violencia domestico cu ta afectando hopi famia; e abuso verbal y fisico cu hopi ta pasa den dje, y e miedo di e partner afecta pa haci denuncia y enfrenta e situacion. Na esaki por suma e adiccion na alcohol of droga, e falta di balor y principio cu ta e ehemplonan cu yiunan ta wak tur dia, y no laga afo e abuso sexual di mucha, den seno familiar mes, cu mayoria di biaha ta keda scondi mientras e criatura ta carga su dolor y ta sake afo den forma di mal comportacion, por ehemplo, na scol.

Esaki ta un tema cu mi no kier laga den lashi. Lo mi sigui trece dilanti pasobra e tin hopi dimension.

- Advertisement -

DUNA COMENTARIO

Please enter your comment!
Please enter your name here