Home General Ursell Arends, lider di RAIZ: “Nos vision pa e politica moderno no...

Ursell Arends, lider di RAIZ: “Nos vision pa e politica moderno no ta biba den e partidonan politico tradicional”

2191
0
SHARE
- Advertisement -

ORANJESTAD (AAN) – Matutino DIARIO a ricibi bishita di e hoben Ursell Arends, lider di Partido Politico RAIZ, hunto cu Jakemar Kock ken ta su ruman y su tata, sr. Adolfo Arends.

Ursell y Tai Foo Lee ta fundador y co-fundador di e partico. “Sembrando Futuro” ta e slogan di RAIZ.

Ban conoce un tiki ken Ursell ta:

Ursell ta casa y tata di dos yiu. un hoben profesional di 36 aña di edad. E tin un Degree den International Business Management. “Mi a studia na Windsor Ontario University, na Canada, despues di a regresa Aruba mi a bin ta labora e ultimo diez añanan den sector turistico. Mi ta operation manager di La Quinta Beach Resort, y alavez Presidente di Aruba Time Share Association y mi ta conoci tambe door di milita den e Federacion di Futbol ‘Arubaanse Voetball Bond’ (AVB). Na 2002 mi a wordo scoge como e dirigente deportivo di aña. Semper mi a encanta e oportunidad pa empodera otro, y mi ta kere cu mi entrada den politica lo yuda mi empodera mi pueblo di Aruba, cual ta mi intencion y meta tambe”.

CON RAIZ A NACE:

Tocante e iniciativa bao cual Partido RAIZ a lanta, Ursell a duna di conoce: “E ultimo 31 añanan, nos generacion di cual mi ta representa cu ta millennials a para na banda y wak con e sistema y politica tradicional, a goberna nos Isla.

Y awe, nos tur por wak e resultado y pronostica nos futuro den man di e sistema aki. Despues di a sinta y combersa cu mayoria di e partidonan politico estableci,  ami cu e co fundador Tai Foo Lee, a realiza cu nos vision pa e politica moderno, no ta biba den e partidonan politico tradicional. Nos di RAIZ no ta kere den uza e formula pa polariza y dividi un pueblo, basa riba sticker, bandera y flanel. Esaki ya no tin espacio mas den e epoca moderno aki”.

RAIZ ta kere den e tecnologia cu tin awendia pa duna exposicion, manera e social media y fuera di esey nan ta kere den rebiba e dialogo social.

“Dia 22 di Juli cu a pasa nos a cuminza ‘cultivando tour’. Kiermen, nos ta bishitando e barionan pa asina presenta nos plan y dialoga cu e pueblo di biaha.

Di e forma aki nos ta ricibi e feed back unda cu pueblo ta desea mehoracion di tanto e calidad di bida como di e poder di compra sin laga afo e desaroyo social di nos isla, unda cu e ser humano ta central”.

 

VISION – MISION:

Aspecto Social:

“Nos vision ta un Aruba di posibilidad y igualdad. Den esaki nos tin un plan pa combati pobreza door di defini e factornan cu ta midi pobreza, pa asina aki nos por crea solucion pa e situacion cu ta reinando cerca esnan mas vulnerable di nos pueblo:

Pilarnan economico:

“RAIZ kier crea diferente pilar economico, cuminzando pa e parti di conocemento. Esaki usando e creatividad y imaginacion di nos propio yiunan di tera, pa bin cu ideanan nobo, pero tambe haciendo uso di e avancenan tecnologico pa crea di Aruba e Silicon Beach di Caribe.

Tambe desaroyando e agricultura, pa asina nos divisa por keda na Aruba mes, y duna oportunidad na tur Arubiano biba mas saludable cultivando nos productonan di tera door di nos mes”.

Enseñanza:

“RAIZ ta kere den crea fondonan for di turismo pa inverti den educacion. Nos ta kere den crea un ‘destination tax’ for di ‘tourist levy’ cual aworaki ta bay pa ATA. Nos kier comparti 80% (59 miyon fls) pa mercadeo di producto Aruba y operacion di ATA, 10% (7.3 miyon) pa TPEF (Tourism Product & Enhancement Fund), 10% (7.3 miyon) pa TEF (Tourism Education Fund)”.

Salud:

“RAIZ ta di opinion cu nos tin cu cambia e forma con pa atende e salud di nos pueblo, y e mentalidad di e sistema solamente curativo, pero bay mas den preventivo y alavez bay bek pa wak si AZV ta funciona debidamente, mirando cu e aña aki nos ta bay celebra 15 aña di introduccion di AZV y nos kier evalua si e ta funcionando debidamente. Kico tabata su intencion y kico ta su experiencia, kico ta e aanpak pa wak su efectonan”.

 

TRANSPARENCIA:

“RAIZ ta pone enfasis riba transparencia y ta propone un modelo nobo pa Aruba cu ta basa riba acceso na informacion, participacion como derecho di cada ciudadano, transparencia, y uso di data como instrumento pa haci e decisionnan corecto pa nos pueblo.

Nos ta kere cu e manera con e sistema tradicional a funciona e ultimo 31 añanan a obstrui tur esaki y a bira ora pa nos haci un cambio real”.

Respet mutuo:

“Mi ta kere cu e situacion cu a bin ta tumando lugar e ultimo dianan caminda cu partido politico ta scoge pa kibra regla y dicidi riba nan mes pa entrega nan lista riba horario no stipula pa Conseho Electoral, ta un ehemplo perfecto pa ilustra e necesidad cu nos tin riba e Isla aki pa comunica y trata otro cu respet mutuo, pa asina mehora e situacion general. Nos a yega na e Aruba di awe door di e sistema tradicional y nos, definitivamente, no por continua cu un Isla sin liderazgo. Liderazgo cu ta traha fuerte cada minuut di dia pa uni nos pueblo”, Ursell Arends, lider di RAIZ a conclui.

 

- Advertisement -

DUNA COMENTARIO

Please enter your comment!
Please enter your name here