ORANJESTAD (AAN): Tabata reina un alegria ora cu despues di 18 aña nan ruman, tio miembro di famia Rupert Ceferino Boye, mihor conoci como Ruru a bolbe Aruba.
Pa algun luna atras a yega na conocimento di Diario cu e conoci Ruru lo ta encontra problema na Santo Domingo. Diario a notifca via polis pa pone famia na altura. Mientras tanto dos luna pasa tambe un prima di Ruru Boye segun un version riba “Facebook” e mucha muher Shirley Croes a pidi atencion pa un situacion di un homber Arubiano di edad cu ta biba den un situacion inhumano na Santo Domingo.
A base di e informe riba facebook e famia a cuminsa cana e caminda pa nan ruman, tio, bolbe na su Isla natal. Locual e famia a bin tende tabata cu Ruru hopi aña pasa a inverti den un finca na Santo Domingo, despues cu e doño a fayece e finca a wordo bendi y nan a pone Ruru riba caya.
Ruru Boye diasabra ultimo a cumpli 73 y e tabata drumi riba caya den e bario San Cristobal y e no tabatin entrada, tampoco cos pa come. Danki cu tabatin un famia cu tur dia ta percura pe y na unda Ruru por a bay. Via die famia aki a bin contacto entre ruman hombernan y ruman muhernan di Ruru y primonan y primanan.
Debi na su situacion contacto a wordo tuma directocu Minister di Buitenlandse zaken na Aruba cu Embahada di Reino na Santo Domingo. Na prome instante e tabata mustra masha dificil pa por haya Ruru bolbe na Aruba. Na prome instante e no tabatin paspoort pa e por identifica su mes na embahada di Reino na Santo Domingo.
Pa colmo basta aña pasa e lo a perde su paspoort. Cu yudanza di famia a wordo manda documentonan cu cual Ruru por a wordo identifica. Tambe e hecho cu Ruru ta sin placa a biaha di San Cristobal pa e embahada di Santo Domingo tabata reto grandi.
Ta danki na famia preocupa a percura pa yuda cu Ruru por a presenta debido serca e embahador y tambe nan a compañe. Cu yudanza di esnan cu bon curazon pa cuminsa Shirley Croes y e hendenan cu a reacciona via face book y a comparti e informe nan a logra localiza Rupert Ceferino Boye porfin.
Na nomber di Rubert Ceferino Boye y na nomber di henter famia nos kier gradici di curazon e hendenan muy en particulaar Shirley Croes cu a pone e informe riba facebook y e hendenan cu a reacciona, Reinier Davina y colleganan di Embahada di Reino na Santo Domingo, Minister Abath di Asuntonan Exterior y sigur tambe e famianan na Santo Domingo cu a yuda guia Ruru durante di e proceso completo y a percura pa e haya cuminda cayente y a hasi comunicacion y e cariño pa ser humano May god Bless you all. Porcierto danki pa e milagro cu Ruru a bolbe su Isla natal despues di 18 aña ayera 28 Augustus 2017 na edad di 73 aña na unda e lo goza atrobe di nos Aruba Dushi Tera.
