Home Hudicial A pospone caso contra trio cu a menaza hendenan cu arma

A pospone caso contra trio cu a menaza hendenan cu arma

70
0
SHARE
- Advertisement -

ORANJESTAD (AAN): Recientemente Corte den Promer Instancia a pospone e caso penal cu Ministerio Publico a cuminsa contra e hombernan M.T., O.T. y K.T. Esaki riba peticion di Fiscal mes, kende a bisa Hues cu e procesverbaal oficial no ta cla.

MENAZA CU ARMA:

E hombernan M.T., O.T. y K.T. a presenta dilanti Hues relaciona cu un caso di amenaza cu arma.

Fiscal a bisa Hues cu e acusacion contra e trio aki ta cu riba 27 April 2017, nan tabata den posecion di un revolver cu bala. Ademas di esey, nan ta worde acusa cu riba e mesun fecha ey, nan a menaza personanan cu morto.

Ta acusacionnan serio cu Fiscal a presenta contra e trio aki.

CASO POSPONI:

Sinembargo, tratamento di e caso no a sigui. Fiscal a informa Hues cu door cu e procesverbaal oficial no ta cla, no por trata e caso. Pesey el a pone e caso pro forma.

Fiscal a propone pa tratamento di e caso tuma lugar dia 27 di October 2017.

Hues a bay di acuerdo cu e proposicion di Fiscal y a pospone e caso pa dia 27 di October 2017, mientras cu e trio ta keda encarcela.

Ultimo añanan, mas y mas casonan di menaza cu arma di candela ta worde trata den Corte. Esey ta un indicacion cu tin hopi arma di candela ta circula ariba Aruba, cual ta motibo grandi di preocupacion.

Ministerio Publico a fiha un maneho caminda ora Polis gara un persona cu un arma di candela, e por spera cu e ta haya 12 luna di prison. Ultimo tempo, mirando e situacion alarmante, Ministerio Publico a aumenta e castigo na 15 luna di prison.

Durante tratamento di casonan di posecion di arma di candela, sa scucha abogadonan mustra cu e arma tabata warda na cas pues no por papia di posecion activo. Hues ta mustra comprension pa esaki.

Sinembargo ora ta trata di menaza cu arma di candela, ta otro scenario tin. Eynan, intencionalmente e persona of personanan a sali cu arma di candela, sabiendo cu esaki ta prohibi pa ley. Ariba dje, a menaza hende of hendenan cu morto cu e arma.

Esaki den bista di Ministerio Publico, ta un menaza hopi serio y ta baha pisa riba e tipo di delito aki. Mas ainda si ta trata un asunto cu lo tin indicacion cu por ta un asunto di gang.

Kico realmente a pasa cu e trio M.T., O.T. y K.T. a menaza diferente hende cu un arma di candela, no ta conoci ainda. Ta ora cu tratamento di e caso tuma lugar den Corte lo haya sa y DIARIO lo informa lectornan debidamente di esaki.

 

- Advertisement -

DUNA COMENTARIO

Please enter your comment!
Please enter your name here