Home General Accion contra criadero di sangura ta sigui

Accion contra criadero di sangura ta sigui

54
0
SHARE
- Advertisement -

ORANJESTAD (AAN) — Accion contra criadero di sangura ta continua y pueblo tambe mester por yuda combati esaki.

Asina dr. Maritza Ordoñez, di Dpartamento di Salud Publico (DESPA) a menciona, den entrevista cu Matutino DIARIO.

E dama a subraya cu e plan riba su mes ta bon, pa asina evita di wordo pica pa sanguranan cu ta carga e tres virus, esta dengue, Zika y Chikungunya. Tur esaki por wordo preveni door di haci rond di cas limpi.

“No mester lubida cu GKMB ta siguiendo su plan di accion tremendamente bon. Una bes cu haya e notificacion, nan ta bay. E flowchart ta sigui traha tremendo.

“Un bes cu e docter di cas tin caso sospechoso pa tur tres, e ta manda test pa laboratorio, di biaha ta bay pa DBZ, despues ta yama GKMB, e ta pasa su trabao y ta pasa na Seccion di Epidemiologia e informacion, ta follow up y ta mira unda e problematica di sangura ta sigui.

Tristemente, tin cu bisa cu hopi di e casonan ta den e barionan di Pos Chikito, Savaneta, San Nicolas, Noord, Paradera, entre otro”.

Dr. Ordoñez ta acentua cu e responsabilidad di cada hende den su cas ta pa bay sikiera dos biaha pa siman pafo, tira un bista unda cu tin awa para. Baki di e mascotanan, e tapa di pos cu mester ta bon cera. Wak e awa cu bo ta colecciona bao di e airco, tir’e afo. Tur esey por tin un webo para, wardando un tiki awa pa por broei.

“Nos ta bay haya mas awa sigur. Pronostico ta bisa cu awacero ta biniendo. Aworaki tin hopi hende ta cu vacacion, pero esnan cu ta na cas, tin cu haci un tiki mas pa e cas. Si bo ta mira cu bo no por combati e criaderonan, yama GKMB. Nan tin practicamente e solucion y e consehonan kico bo tin cu haci”, dr. Ordoñez a subraya.

Nos tin e sangura y tanten cu e sangura ta aki no por haci mucho. Tin cu combati’e. Elimina e criadero ta esencial. Sin criadero, no tin sangura y sin sangura, no tin ni dengue, ni Zika, ni Chikungunya, e dama a agrega.

Hende grandi y mucha ta keda semper vulnerable pa loke ta trata sangura, segun docter Maritza Ordoñez.

“ E hendenan grandi pasobra mayoria di nan, un bes cu nan ta di edad avanza, nan tin un of dos malesa cronico acerca. Sea ta di curazon, sea di riñon, pulmon. Un bes cu bo haya cualkier virus, Dengue, Chikungunya, Zika, pa mas leve cu ta, semper e ta bira un complicacion. Vooral e persona cu ta riba cama, cu no por cana of cu no por bal pa su mes, ta un persona vulnerable pa cualkier situacion”.

Ordoñez ta splica cu dengue ta mucho mas peligroso y mortal, compara cu e otronan dos. “Solamente Zika tin un problema en conexion cu e hende muher na estado y su baby. Pero dengue ta mucho mas peligroso. Mayoria di e poblacion ya tabata tin contacto cu dengue. Si aworaki, un biaha mas otro serotipo ta drenta den bo curpa, bo tin chens pa haya un dengue hemoragico y esey ta mortal” dr. Ordoñez a remarca.

Nos mester ta mas alerta den e temporada aki. Tambe cu un mucha chikito, pasobra e no tin su sistema inmunologico fuerte ainda. Cualkier malesa di esaki drenta su curpa, por bira un complicacion.

“Si bo tin mama, tata, welo, malo na cas, no mester lubida, tira un bista rond di cas y paden tambe. Hopi biaha tin tanto potoshi den un camber, cu por automaticamente bira un criadero pa sangura, dr. Ordoñez a comenta.

- Advertisement -

DUNA COMENTARIO

Please enter your comment!
Please enter your name here