Home General AIB Bank: Mas di 1 miyon florin na renobacion di monumento

AIB Bank: Mas di 1 miyon florin na renobacion di monumento

100
0
SHARE
- Advertisement -

ORANJESTAD  (AAN) — Recientemente AIB Bank N.V. a celebra cu e contratista Aguirre Garcia & Sons a yega e punto mas halto di construccion durante renobacion di e edificio situa den Zuidstraat, net patras di e edificio actual di AIB Bank den Wilhelminastraat. Nos a acerca Director Di AIB BANK pa un entrevista recientemente pa sa di inversion haci. “Nos tabatin hopi opcion, pero a scoge esun mas cu ta pas cu nos balornan como banco. Cu esaki nos ta subraya nos compromiso serio como un bon ciudadano corporativo, di ta inverti nos placa bek den nos economia y mes momento rescata un monumento”, asina Frendsel Giel, Director di AIB Bank N.V. a duna di conoce.

Desde aña 1998 AIB Bank a muda pa nan edificio actual den Wilhelminastraat. Cu tempo, dor di crecemento continuo, a huur un edificio mas den banda. Pero 5 aña pasa, AIB Bank a adkiri e edificio den Zuidstraat, unda antes tabata Museo Numismatico. Awor a opta pa renob’e, manteniendo su estilo monumental, pero agregando aspectonan moderno pa acomoda entre 10 pa 15 empleado di varios departamento di e banco. Na tur e proyecto ta costa mas o menos 1.3 miyon florin.

“Pa nos ta importante sigui inverti den e economia cu tanto ta sostene nos y ta confia nos cu proyectonan grandi. Ultimo añanan nos a facilita fiansanan grandi pa Aruba, manera ta Hospital, proyectonan di Green Corridor, Watty Vos Boulevard, proyectonan di SOGA y FDA por ehempel addicional na e projectonan di sector priva. Ta e mesun confiansa cu nos ta haya di comercio, e mesun confiansa nos ta demostra bek dor di inverti den nos mesun economia”, di acuerdo cu Frendsel Giel.

Pa loke ta infrastructura di e banco, den pasado caba a inverti den cumpra e parkeerplaats cu tabata di santo y cu un luga pa laba auto. A traha un bunita cura rond di dje, y asina combirti’e den un parkeerplaats pa empleadonan di e banco, embeyeciendo Wilhelminastraat. Cu e adkisicion di e edificio den Zuidstraat, pega tras di e edificio di AIB Bank, lo crea henter un blok di Wilhelminastraat te Zuidstraat, bunita drecha y manteni. Ta nan intencion pa pone poco klinkers tambe den e area di e banco den Zuidstraat.

Si tur cos bay segun plan, lo entrega e proyecto na fin di e prome kwartaal di 2018, aunke cu te awor e trabounan ta mustrando bastante adelanta.

“Cu sosten y confiansa di comercio, nos lo sigui crece y lo sigui inverti den nos mesun economia, manera ta conservacion di e monumento aki. Nos ta masha orguyoso di por duna di nos banda pa sigui embeyece e area aki”, asina Frendsel Giel a termina bisando.

 

- Advertisement -

DUNA COMENTARIO

Please enter your comment!
Please enter your name here