Home Hudicial Caso e siman aki di preso cu a hinca otro preso cu...

Caso e siman aki di preso cu a hinca otro preso cu schroefdraai den garganta

93
0
SHARE
- Advertisement -

ORANJESTAD – Un otro caso di hincamento di preso den KIA, lo wordo trata e siman aki den sala di Corte di Husticia.

HINCA PRESO

Luna pasa e homber A., a presenta dilanti Hues pa e caso penal cu Ministerio Publico a cuminsa contra dje.

Fiscal a bisa Hues cu e acusacion contra A. ta cu riba 8 April 2017, el a hinca un persona cu un schroefdraai den garganta. Fiscal a sigui bisa cu e hincamento aki a sosode den KIA y cu e victima ta e homber preso M.

Fiscal ta haya cu esaki ta un caso di intento di asesinato. Subsidiario e ta acusa A. di maltrata cu un arma.

CASO E SIMAN AKI

Ta asina cu e caso a bin dilanti na Juli 2017 pro forma. Fiscal a pidi Hues pa pospone tratamento di e caso aki pa dia 18 Augustus 2017, esta e siman aki.

Hues a bay di acuerdo cu e peticion di Fiscal y a pospone e caso pa e siman aki.

E sospechoso A., recientemente a wordo condena y ta sintando su castigo. Aparentemente a surgi un situacion den KIA caminda un otro preso a wordo hinca den garganta.

Con e sospechoso A. a yega na un schroefdraai, ta keda un pregunta cu posiblemente durante tratamento di e caso, sea Fiscal of Hues lo bay puntra.

Ta un hecho cu den KIA, presonan ta fabrica arma pa defende nan mes contra otronan cu ta menaza di maltrata nan.

Con e presonan aki ta yega na e metal pa despues fabrica esaki, tambe ta un pregunta cu no tin contesta.

KIA TA KEDA PELIGROSO

Ta un secreto publico cu tin traficacion di droga den KIA y na mesun momento tin traficacion di cellular y posiblemente cosnan cu por wordo usa como arma tambe.

DIARIO a yega di publica varios caso caba di hincamento den KIA, caminda un preso ta hinca otro cu sea cuchiu of schroefdraai. Esaki ta haci cu e situacion den KIA ta keda alarmante. E seguridad di tanto e presonan como e cuidadornan di preso ta na peliger.

Algun luna pasa tabatin un caso di hincamento cu cuchiu, caminda e sospechoso a mustra Hues bon cla cu tur cos tabata un set up contra su persona pa nan hink’e pero el a actua promer.

E sospechoso a mustra Hues con e tabata cana su so ta parti cuminda pa presonan, siendo cu mester tabatin a lo menos un cuidador di preso ta cana hunto cun’e.

Tambe el a mustra cu ora di parti cuminda, tur preso mester ta sera den nan cel. Con por ta posibel cu e preso cu a wordo hinca, hunto cu un primo di dje, tabata pafor di nan cel!

Tur esaki tabata bisto riba e camera di seguridad den KIA.

ORGANIZACION DEN KIA

Tur e informacion cu e sospechoso a duna, ta mustra cu aparentemente tin un organizacion completo den KIA caminda hasta cierto cuidador di preso lo ta envolvi y asina ta regla cuenta di otro preso of presonan cu nan no kier mira.

Den Corte varios biaha abogadonan ta señala cu nan cliente a wordo menaza of bati. Hasta tabatin un abogado cu a mustra cu segun informacion cu el a haya for di diferente preso, KIA ta manera un “Ghetto”.

Ta conoci den comunidad cu tin dos preso cu a wordo condena pa asesinato y tur dos ta sintando nan castigo den exterior pasobra tin indicacion fuerte cu si nan keda sera den KIA, nan lo wordo mata eyden.

Esaki ta un situacion hopi preocupante y alarmante, caminda NO por garantiza e seguridad completo di e presonan.

 

 

- Advertisement -

DUNA COMENTARIO

Please enter your comment!
Please enter your name here