Home General Conseho Electoral: Di tur e listanan entrega tin un cu no ta...

Conseho Electoral: Di tur e listanan entrega tin un cu no ta cuadra cu criterianan di validez

623
0
SHARE
- Advertisement -

ORANJESTAD   (AAN):  Conseho Electoral a tene un conferencia di prensa relaciona cu e validez di e lista di candidatonan cu a wordo entrega recientemente door di e partidonan politico.

Glen Thode, Presidente di Conseho Electoral a duna di conoce cu nan a reuni diabierna despues cu siman pasa tur e listanan cu a wordo entrega y e listanan riba cual nan a constata cu aki y aya mester a coregi algun punto pa esaki keda cuadra cu e criterianan legal.

CE a saca e cartanan pa esnan cu a entrega e lista y a tuma nota di e coreccionnan cu a drenta y pesey por a dicidi riba validez di e listanan, Thode a indica.

Di tur e listanan entrega tin un lista cu no ta cumpli cu e criterianan di validez. Ta un lista cu tin 10 nomber riba dje y e prome candidato ta Sr. Elton L. Lioe-A-Tjam.

E razon pa cual e lista aki no por wordo declara valido ta pasobra e no ta cumpli cu loke ta determina den e articulo 25 di e Kierverorning bao di “d” cu ta e cantidad di votadornan cu lo duna sosten na e lista aki, Glen Thode a subraya.

El a sigui bisa cu e otronan listanan si a constata nan validez. Ta trata di e lista di cu 8 candidato y e prome persona riba e lista ta Sr. Olmo Henriquez. E di dos lista valido ta un lista di 10 candidato encabeza pa Sr. Ricardo Croes.

E di tres lista tambe tin 10 candidato y e prome candidato ta Sra. Christina Lampe. E di cuatro lista tin 20 candidato encabeza pa Candelario Wever.  E siguiente lista valido ta contene 29 candidato y e prome nomber ta Evelyna Wever.

E otro lista valido constata ta otro lista cu 29 candidato y e prome nomber ta Otmar Oduber. E siguiente lista tin 5 nomber y e prome candidato ta Ursell Arends. E ultimo lista cu a constata su validez tin 29 candidato y ta lidera pa Michiel G. Eman.

Conseho Electoral a tuma e decision di validez aki riba dia 25 di Augustus y pa esaki a bay over na firma e documento corespondiente.

Segun Thode, esnan cu no ta dui acuerdo cu e decision aki tin dos dia pa apela na Corte. E proximo reunion lo ta dia 30 di Augustus benidero pa 2’or di atardi na Stadhuis unda lo determina e numeracion, e secuencia di e listanan. Tambe lo pasa pa determina e colornan y si ta necesario lo tira lot segun ley pa determina e colornan di e listanan.

 

- Advertisement -

DUNA COMENTARIO

Please enter your comment!
Please enter your name here