Home Social Costa Rica den peregrinacion pa bishita imagen di Birgen di Los Angeles...

Costa Rica den peregrinacion pa bishita imagen di Birgen di Los Angeles awe

34
0
SHARE
- Advertisement -

Mas di dos miyon devoto:

ORANJESTAD (AAN) – Dia 2 di Augustus ta un dia masha importante pa e comunidad Catolico di Costa Rica cu su tradicional peregrinacion (yama Romeria) cu ta sali for di tur punto di e pais pa Cartago, unda e basilica di e Birgen di Los Angeles ta ubica.

No obstante cu ta un festividad nacional, tin hopi hende cu ta viaha for e paisnan di Centroamerica, y mas tanto di Nicaragua, pa bishita e Birgen, y tambe for di Panama unda tin su devotonan. Y no por keda sin menciona cu tambe na Aruba e tin devoto, cu por cierto den pasado e tabata viaha pa participa den e Romeria, pero awor no mas pero si ta yama puntra nos pa no lubida riba “nos negrita”.

Tur aña mas of menos 2 miyon di devoto ta haci nan canamento te Cartago. Algun ta yega cu algun medio di transporte pero mayoria ta bay na pia, loke ta tuma nan minimo dos dia y esnan cu ta biba mas leu di e Provincia ta dura mas, y hasta tin hende ta cane sin zapato segun e fabor cu nan ta bay gradici of e gracia cu nan ta bay pidi.

Na Costa Rica e Birgen ta wordo yama “La Reina de los Angeles” como tambe e “negrita” y el a wordo nombra door di Papa Juan Pablo II, e Patrona di Costa Rica.

Segun por lesa den rednan social, ni e awaceronan pisa y frio intenso, di e dianan aki, por a stop e peregrinonan di cana te e basilica, den nan fervor. E tradicion ta ofrece e Birgen obhetonan di oro of plata, cu ta wordo deposita den un vitrina masha grandi mes, hopi bon vigila pa evita hortamento y ningun bishitante por mishi cune tampoco. E obhetonan ta segun e milager ricibi, y por mira for di formanan di baby recien naci, te un pareha bisti di casamento, pia of man cu a wordo opera exitosamente, entre hopi mas motibo.

Semper, riba 2 di Augustus, lo celebra cu un Santo Sacrificio di Misa Solemn, den oranan di mainta, y generalmente e basilica ta bira completamente yen di feligres, cu hasta mester pone stul pafo, cu tampoco ta suficiente. Hopi hende ta yega na rudia te e altar. Pues, un tradicion precioso, hopi similar na esun di Birgen di Guadalupe na Mexico.

 

- Advertisement -

DUNA COMENTARIO

Please enter your comment!
Please enter your name here