Home Politica Den programa di gobernacion di AVP lo sigui cu desaroyonan pa eleva...

Den programa di gobernacion di AVP lo sigui cu desaroyonan pa eleva nivel di bida di nos hendenan

41
0
SHARE
- Advertisement -

Parlamentario Desiree de Sousa Croes

ORANJESTAD(AAN)–  Parlamentario di AVP Sra. Desiree de Sousa Croes a emiti un comunicado den cual el a skirbi cu Diamars anochi partido AVP a presenta su programa di gobernacion pa e proximo periodo di gobernacion cu a conta cu participacion di hopi instancia y tambe participacion di hopi ciudadano kendenan a wordo consulta den bishitanan di AVP den barionan rond Aruba.

Parlamentario di fraccion di AVP, mr Desiree de Sousa Croes a mustra cu locual AVP a haci cab a, pueblo por mira tur caminda ora cu na 2009 cu AVP a cuminsa goberna e pais aki, mester corda kico nan a haya e tempo ey.

Hopi hende ta bisa cu e placa pa entre otro enseñansa, tabata hopi cosmetica pero esaki tabata necesario  ya cu ora a haya e scolnan na 2009, e edificionan tabata literalmente cayendo riba e alumno- y maestronan y ta algo cu mester a wordo drecha.

“Cantidad di scol a wordo drecha rond Aruba, mas cu 80 scol a wordo atendi y e situacion den cual a haya e scolnan aki for di gobierno di MEP, tabata den asina  mas estado cu mester a bay over na drecha nan tur pa percura pa nos muchanan por a sigui nan estudio den un edificio agradabel y  den bon condicion.

Hopi placa a bay den enseñansa y esaki ta e trend cu nos kier bay sigui den añanan cu ta bay sigui.

Ta suerte di mi persona tambe como hende di Pos Chikito, ora cu mi drenta e casnan cu nos ta bishitando tur dia, ta hopi mas facil mi splica kico nos gobierno a haci y mi no mester bisa pa bay wak for un potret of riba un programa, pero solamente Sali pafo un rato y mira kico a wordo cambia den e bario, den nos vecindario.

Ta hopi bunita y tambe hopi importante pa nos hendenan, ya cu esaki ta drecha nos calidad di bida y ta un di e promesanan cu a wordo haci pa nos partido y cu nos a cumpli cune tambe.

Nos a scucha opositornan ataca nos tur dia riba loke nos a haci manera entre otro cu klinkers cu a wordo poni y ta lanta e pregunta cu di con dilanti di nan cas si ta importante por pone klinkers y dilanti cas di nos hendenan ta di menos importancia.

E storia aki ta sigui, e trabounan tin cu sigui y nos ta wak tambe con nan ta ataca nos y cierto manera bo ta bisa cu tur  hende claro, contra di gobierno di AVP, cu tanto partido cu tin na e momentonan aki, pero nos a mira berdad y ta mas cu logico, tur a cera contra e partido cu ta forma gobierno pero nan ta den un situacion hopi dificil pasobra cu Gobierno a mustra con el a traha den ultimo añanan y pueblo por mira esaki.

No solamente riba tereno di infrastructura, pero tambe pa loke ta scolnan, edificionan di MFA, y tambe pa locual nos a haci pa nos studiantenan, riba tereno di asunto social den nos comunidad.

Tin hopi trabou ainda pa haci y ta di suma importancia pa partido AVP presenta su programa di gobernacion na pueblo, pa asina tur hende haya sa con nos lo sigui den e añanan cu ta bin.

Ta claro cu opositornan lo bisa cu nan lo bay hacie miho pero ta importante pa pueblo realisa cu e opositornan aki, sigur si nos papia di esunnan cu tabata den Parlamento den ulitmo ocho añanan, con nan a funciona den Parlamento.

Nos sa cu den e ultimo ocho aña, nos di fraccion di AVP mester a forsa nan pa hasta bin trabou, cuanto nan por a haci si nan a traha den un forma serio pero den ultimo ocho aña masha poco bes por a mira oposicion completo na trabou.

A pesar cu nan ta den oposicion, nan por  a presenta un bon ley of un bon amienda cu sigur fraccion di AVP lo a sostene pero con hopi nan a haci riba e terenonan aki y ta mesun hendenan aki ta drenta cas y bisa votadonan cu awor si nan ta bay traha.

Con den ocho aña den oposicion ni na trabou nan a yega, pueblo tin cu mira e realidad con serio nan tabata den nan responsabilidad den Parlamento y nan no a yega y ora cu nan a presenta na trabou nan no a funciona  y kico a cambio di esaki, fraccion di AVP a haci.

Nos dado momento tabata e fraccion cu ta sostene gobierno y esun cu ta critica gobierno pasobra no tabatin oposicion mayoria di e tempo den ultimo ocho aña.

Pesey mes mi ta pena cu pueblo mirando locual a wordo haci caba y despues cu AVP caba di presenta su bunita programa pa proximo periodo di gobernacion, pueblo por saca su conclusion kende a produci y cual partido ta traha pa Aruba.

Partido AVP sin duda a cumpli cu e responsabilidad cu el a haya di pueblo y nos hendenan por ta sigura cu nos lo sigui haci esaki, caminda ainda durante di campaña trabounan ta sigui wordo haci y den proximo periodo di gobernacion cu sosten di pueblo, lo sigui cu e desaroyonan grandi aki,” Parlamentario Desiree de Sousa Croes ta mustra.

 

 

 

- Advertisement -

DUNA COMENTARIO

Please enter your comment!
Please enter your name here