Home General Director di Hospital Sr. Ezzard Cilie a clarifica e “Hospileaks”...

Director di Hospital Sr. Ezzard Cilie a clarifica e “Hospileaks” cu a trece confusion

370
0
SHARE
- Advertisement -

ORANJESTAD  (AAN): Diabierna mainta Hospital a tene un conferencia di prensa, durante  cual Director Ehecutivo di hospital Ezzard Cilie a papia entre otro riba e carta interno di hospital, cu a wordo manda pa e specialistanan medico, e managernan medico y bestuur di staff.

E carta aki a lek, unda cu tin partidonan politico y prensa cu a trece critica dilanti, pa locual tin skirbi den e carta.

Specialmente e parti unda cu ta papia di reduci e cantidad di cama cu 30.

Cilie a splica entre otro cu e carta aki a sali afo den estilo di Wikileaks y mirando cu esnan cu a lesa e carta y no ta parti di e grupo cu ta esunnan cu mester lesa e carta, a bin cierto confusion.

E specialistanan y otronan cu a haya e carta, si ta compronde claramente e idioma di e carta, segun Cilie.

El a sigui bisa cu mirando cu ta bay muda equipo y hende pa e parti nobo di hospital, ta hasiendo lo maximo pa mantene seguridad di e pashent na prome lugar.

“Mas cu dos luna pasa nos a calcula cu dia 31 di Augustus nos lo bay traslada e prome grupo”.

“Pa loke ta e grupo aki nos a considera tur cos manera nan enfermedad, kico ta e riesgo di nan traspaso etc.”.

Esaki segun Cilie, kende a indica cu si no por garantiza tur cos, e traspaso ta wordo posponi, pasobra mester tene cuenta cu e pashentnan su salud.

E carta a wordo manda pa tur esnan envolvi cu e mudamento, pa tur hende ta den acuerdo cu otro ora cu e momento yega.

Cilie a indica cu tin chens cu mester mas tempo pa muda e gruponan cu nan kier a muda.

El a sigura cu hospital no tin ningun presion di ningun partido politico cu e mudamento mester tuma lugar prome cu eleccion.

Si no por muda ainda, lo no haci’e.

Pa loke ta e asunto di 30 cama menos, e Director Ehecutivo di hospital a splica cu esaki tin di haber cu e falta di enfermero cu tin y e presion di trabao cu nan ta experiencia.

Sinembargo, 30 cama menos no kiermen cu si tin 10, 20 of 30 pashent nobo cu bin hospital nan lo no haya un cama of tratamento medico.

Ta asina cu tin pashentnan cu ta keda por ehempel 3 dia mas, siendo cu nan por bay cas caba.

E peticion den e carta ta entre otro pa hasi un esfuerzo, unda cu pashentnan cu por bay cas caba ta wordo manda cas, pa asina tin menos pashent pa atende cune, pues menos cama.

Mirando e falta di enfermero, si baha e cantidad di cama (pashent cu ta interna den hospital), esaki lo yuda e enfermeronan cu e presion di nan trabao.

Si un pashent mester drenta cu urgencia, ta habri un cama pe y e ta haya su cuido y tratamento mescos cu tur otro.

Cilie y tambe ciruhano Yuri Casseres durante e conferencia di prensa a sigura cu ‘baha cantidad di cama’, cu 30, no kiermen cu di awor pa dilanti 30 hende menos por haya cuido den hospital.

Esun cu mester cuido, ta haya cuido.

Pesey segun Cilie, ta fastioso cu e carta a sali afo, pasobra esnan cu si tabata tin derecho di haya e carta ta compronde e lenguahe, mientras  prensa y politiconan cu a lese, quizas no a capta full e nificacion di locual tabata skirbi.

Un cos ta sigur, cu mester hasi un esfuerzo maximo pa busca mas enfermero.

Cilie a splica cu na diferente parti di mundo incluyendo Hulanda y Merca, tin falta di enfermero.

El a indica cu hopi biaha e enfermeronan ta haya un opleiding atravez di hospital y despues nan ta wordo contrata pa otro companianan y esaki tambe ta fastioso.

El a bisa cu den pasado a busca un grupo di enfermero na Filipinas y cu quizas mester bay hasi esaki pronto atrobe.

 

- Advertisement -

DUNA COMENTARIO

Please enter your comment!
Please enter your name here