Home General Director di SVb Ir. Edwin Jacobs: “E grupo di pensionadonan cu no...

Director di SVb Ir. Edwin Jacobs: “E grupo di pensionadonan cu no ta ricibi pension completo a aumenta ultimo añanan”

1126
0
SHARE
- Advertisement -

ORANJESTAD (AAN)– Un desaroyo di cual masha poco nos sa tende, pero cu ta un problema social potencial, ta e hecho cu tin pensionadonan cu no ta ricibi e suma completo di pension di behez di SVb.

Pa haya un mihor bista di e asunto aki nos redaccion a acerca director di Banco di Seguro Social, SVb, sr. Edwin Jacobs.

Ki ora ta haya reduccion?

Sr. Jacobs a cuminza ta splica cu un ciudadano ta acumula derecho riba pension di behes, AOV, for di e momento cu e ta inscribi na Registro Civil di Aruba. E ciudadano ta cuminza acumula derecho for di su edad di 15 aña te cu e edad di pension di behez. Pa cada aña durante e periodo aki di su bida cu e pensionado no tabata biba y registra na Aruba, e ciudadano ta ricibi un reduccion riba su pension. E ciudadanonan aki ta haya un asina yama pension corta. Pa 2017, e reduccion pa cada aña ta di 2,14% pa pension di soltero y 1,07% pa cada aña riba e pension di pareha.

Cuanto pensionado tin reduccion?

Riba e pregunta aki sr. Jacobs a indica cu dia 1 di augustus ultimo, SVb a paga un total di 20.927 pension di cual 18.809 tabata paga na Aruba. E 18.809 pensionnan aki tabata pa 18.966 pensionado. Un total di 71,1% di e pensionadonan aki a naci na Aruba, 7,5% a naci den otro partinan di Reino Hulandes y 21,4% a nace pafor di Reino Hulandes. Di e pensionadonan naci na Aruba 28,7% tin un pension cu reduccion, mientras cu di esnan cu a naci pafor di Reino, 92,4% tin un pension corta. Di e pensionadonan naci den otro paisnan den Reino un 57,9% tin un pension corta.

Potencial problema:

Sr. Jacobs a sigui mustrando cu SVb ta monitorea di cerca e desaroyo aki, pasobra pensionnan corta ta representa un potencial na problema social. Sr. Jacobs ta recorda cu gobierno a introduci e pension di behez na 1960 cu e meta principal di combati y evita pobreza bao di e poblacion di adultonan mayor riba nos isla. Y SVb ta vigila di cerca desaroyonan cu por pone den peliger e meta principal aki. Y segun sr. Jacobs, e pensionnan corta por contribui na pobreza cerca nos hendenan grandi. Sr. Jacobs ta mustra cu principalmente e grupo di pensionadonan naci pafor di Reino ta core e riesgo mas grandi. Por asumi cu mayoria di e pensionadonan cu a nace den Reino ta ricibi un pension adicional di un otro pais den Reino, principalmente Hulanda. Ora pone e dos sumanan aki hunto, e chance ta grandi cu e suma di pension ta alcanza e suma di AOV na Aruba.

Pa e pensionadonan naci pafor di Reino e situacion ta completamente diferente. E gran mayoria no lo tin un pension adicional di nan pais y ni di trabao. E pensionadonan aki ta, por lo general, personanan cu a bin traha na Aruba y e temponan ey ainda no tabata tin e pension general di trahador.

Cantidad aumentando:

Sr. Jacobs ta mustra cu e cantidad di pensionadonan naci pafor di Reino cu pension corta ta aumentando e ultimo añanan. Dia un di augustus ultimo, di e 3.740 pensionadonan di pafor di Reino cu pension corta, 2.593 tabata entre 61 y 69 aña. E pensionadonan pafor di Reino cu ta ricibi un pension di soltero, a ricibi na augustus un 545 florin promedio di pension, mientras cu esnan casa a ricibi 1.081 florin. Sr. Jacobs ta sigui mustra cu si e pensionadonan aki no tin otro entrada, e situacion social di nan ta bira dificil y ta ciudadanonan cu potencial pa cay den pobreza.

Ki por haci?

Sr. Jacobs ta termina informando cu SVb ta trahando, na e momentonan aki, riba un rapport caminda lo analisa mas profundo e situacion aki. A base di e resultadonan aki lo pone gobierno na altura di e situacion, pa haya un indicacion den ki forma gobierno ta desea di atende cu e asunto preocupante aki.

 

- Advertisement -

DUNA COMENTARIO

Please enter your comment!
Please enter your name here