Home Politica “E importancia di educacion den nos bida ta incalculabel”

“E importancia di educacion den nos bida ta incalculabel”

74
0
SHARE
- Advertisement -

Gerlien Croes di AVP:

ORANJESTAD(AAN)–  – Cu e meta di paso pa paso sigui ekipa nos sistema educacional pa por ofrece y yuda desaroya cada mucha y hoben, AVP a bin ta renoba hopi di nos scolnan cu un enfasis pa Aruba tin scolnan di miho calidad. Esaki ta parti di e mensahe cu candidato #18 riba lista di Partido di Pueblo Arubano, Gerlien Croes a trece dilanti. Su palabranan tabata na ocasion di e presentacion di programa di partido ‘Padilanti:2017 – 2021.’

Dunando continuacion na desaroyo esencial di calidad aki, mester haci bon uzo no solamente di infrastructura pero tambe di entro otro tecnologia mas avansa den klasnan, y en especial implementa programanan specifico cu ta inspira pa traha duro y sigui crece, asina Croes a splica.

“Nos mucha y hobennan merece e oportunidad pa logra haci uzo completo di nan talentonan, pa pone nan riba e caminda sigur pa un bon trabou, un bon carera profesional y oportunidadnan amplio pa construi un bon futuro; den otro palabra, un bon formacion como ser humano,” e candidato profesional hoben a declara.

Esaki ta nifica cu mester haci bon uzo di programanan manera Traimerdia y duna continuacion na e programa di Nos Atardi pa muchanan di 13 aña bay ariba, pa sigura cu tur mucha y hoben ta avansa sin tardansa; esaki den combinacion cu e scol parti mainta. Esaki ta nifica tambe cu mester crea un ambiente di educacion cu mas contenido y cu ta envolve mas, entre otro, maestronan, mayornan, hobennan, trahadonan social, musiconan, deportistanan pa logra lo maximo den tur mucha y hoben.

AVP ta sali di e punto cu nos scolnan mester provee un ambiente activo, stimulante, unda e muchanan kier ta; unda nan ta desaroya amistadnan sano y siña tanto e parti academico, profesional como tambe e habilidadnan relevante pa bida diario na cas y den comunidad.

Croes: “Nos scolnan mester tin un ambiente sigur, saludabel y cu ta motiva pa investiga y crea. Un ambiente ‘green’ cu hopi mas di nos naturalesa. Pesey ta responsabilidad di Gobierno, hunto cu directiva di scolnan, docente y mayornan, pa haci di tur nos scolnan un luga ideal pa nos muchanan.”

E tarea inmenso aki di sigui transforma nos sistema di enseñansa for di uno antigua y ineficiente pa uno moderno, creativo y stimulante pa alumno y maestro, ta exigi metanan cla, decisionnan realistico y accionnan decisivo pa crea e enseñansa nobo aki pa tur nos alumno y studiantenan.

Pa realisa esaki AVP ta bay: 1. Renoba e experiencia di scol y aumenta e cantidad di studiantenan exitoso na tur nivel, introduci programanan di certificacion; 2. Actualisa e curriculum di scolnan y renoba organisacionnan di scol pa ta mas eficiente; 3. Reenforsa e papel di docentenan den nan funcion, otorgando nan e hermentnan cu ta facilita nan pa ta mas exitoso; y 4. Sigui expande posibilidadnan pa educa comunidad pa cu “Lifelong Learning’’ Enseñansa na Cualkier Momento di Bida.”
“Cu un enseñansa moderno, nada por tene nos hubentud atras. Futuro di nos pais ta den man di nos hobennan. “AVP a y lo sigui renoba nos scolnan y nos enseñansa pa e sirbi nos durante henter nos bida,” asina Gerlien Croes a finalisa su presentacion bisando.

- Advertisement -

DUNA COMENTARIO

Please enter your comment!
Please enter your name here