Home Editorial EDITORIAL: Con serio nos legisladornan y gobernantenan ta cu combatimento di crimen...

EDITORIAL: Con serio nos legisladornan y gobernantenan ta cu combatimento di crimen ?

477
1
SHARE
- Advertisement -

Nos ta drentando ultimo 3 siman di campaña prome cu dia di eleccion, 22 di September 2017.

Si lesa comunicadonan di politiconan conoci y veteranonan, tambe di e debutantenan, ta lesa di e prioridadnan di nan of di nan partido.

Si a sigui e debatenan cu tabata tin, por a lesa e mes topico como “Prioridad nr. 1” y esey ta combati criminalidad.

Di Ministerio di Husticia ultimo 4 aña por a scucha e mes litania di ultimo 30 aña. “Mester combati criminalidad; tambe mester di mas blauw riba caya; no tin e hermentnan pa traha cune”  y asina por sigui. Nada a cambia.

Ministro di Husticia ta wordo critica siman aden, siman afo, luna aden, luna afo, aña den, aña afo y na lugar di mira movecion pa combati criminalidad, ta mira promocionnan “populista”  y promocionnan politico, y durante campaña esakinan a cambia bira mas personal cu celebracion di cumpleaño y fiestanan di Hotdog , Hamburger, BBQ come y bebe.

Empresanan y establecimentonan ta bira victima di ladronicia, kiebra, robonan di gruponan organiza, y si no pone man riba un persona sospechoso cu lo ta envolvi, no ta tende nada mas tampoco.

Un politico di oposicion a yega di publica di e decenas di casonan di atraco cu a tuma lugar den solamente un luna, y parce cu esey no ta conta, of e cantidad di casonan ta significa  nada.

Pa di tanto biaha a scucha atrobe algun dia pasa cu mester tin mas “Neighbourhood watch”, caminda bisiñanan di un bario ta vigila e bario pa otro. Otro luna esaki a bira pasado atrobe

Siman pasa a caba di haci propaganda cu decenas di aspirante policial cu a ricibi diploma of huramenta, pero e gobierno cu lo mester sinta despues di 22 di September atrobe lo cuminza cu e ciclo tradicional di:   “no tin hermentnan, falta material, falta vehiculonan, falta vest di seguridad of anti bala, pero no tin placa.”

Casonan importante pa comunidad no ta wordo soluciona, y si scucha comentarionan; “laga pasa cu ta yiu, of famia di ministro, parlamentario of personahe di partido. E ora ey si henter e cuerpo lo ta investigando y buscando e autor(nan).”

Por asocia e robonan, kiebranan, atraconan y otro tipo di violencia cu crimen organiza, of cu venta y uso di droga. Ta lubida e aspecto social y e deterioro di bienestar humano.

No ta mucho tempo pasa cu Banco Mundial a indica cu crimen den area di Caribe ta mina crecimento, menasa bienestar humano y desaroyo social. Nos ta mira esaki den e cantidad di muchanan cu ta kita di scol, e cantidad di mamanan teenager, falta di empleo y e aumento di actividad criminal.

Te ainda no a menciona e daño cu tur esaki por haci y ya ta causando na nos industria di turismo.

E cultura di crimen cu ta creciendo ta un probema social mas grandi y lo tuma mas accion policial pa resolve.  Nos tin den nos man un cultura di crimen cu lo tuma tempo pa oprimi si nos gobernantenan, nos parlamentarionan  y nos ministronan no tuma esaki na serio. Colectivamente, como un sociedad nos a sinta mira e cultura aki desaroya y ta keda na nos gobernantenan y ministerionan pa tuma e paso necesario cu man duro pa pone fin na esaki “awor” y no “mañan” cu nunca ta yega, cu palabra y frasenan di oro.

Ta poco dia pasa un grupo di 5 pa 7 ladron a kibra drenta un establecimento den area di turismo na Palm Beach y bay cu hasta caha fuerte. Esaki ta malo pa nos isla, principalmente ora ta trata di un area di turismo. Aki sigur ta lugar cu mester di presencia grandi 24 ora di polis . E castigo tambe mester ta mas pisa pa esnan cu ta perhudica e pilar economico di nos isla.

E problema ta cu nos leynan  ta traha di un manera cu no por aumenta e castigo nan.

Di con no a instala ainda tur e cameranan cu tin pa e region y area di turismo? Kico ta warda riba ? Cameranan ta pone ladronnan pensa dos biaha prome cu nan actua.

Por papia di duna trabao, pero den e tempo cu nos ta biba ‘den, dunadornan di trabao ta cu man na cabez pa loke gobierno ta exigi di nan, prome cu nan lo por pensa na por bay tuma hende con cu ta na trabao.

Tambe tin e hecho cu nos isla ta un tera fertil pa tur atracador y traficante di afo y un ta bisa otro di esaki. Esaki tambe ta un di e prioridadnan mas grandi di gobierno tambe, “cuida nos frontera!”

- Advertisement -

1 COMMENT

  1. Combatimento di criminalidad na Aruba ta un “Joke”.

    Tambe mester pone e nomber completo di e criminalnan y stop di uza unicamente inicialnan.

    Pueblo mester ta mas na altura pa duna Shon Polis un man y haci ‘e anonimamente.
    Esnan cu ta formula leynan den Parlamento mester sinta haci nan trabou cu mas seriedad relaciona cu e tema aki.
    Mester bin cambionan profundo den nos leynan pa duna e criminalnan na debido castigo.

    Danki pa e espacio.
    Tico Suarez
    Rudgewood N.Y.
    USA

DUNA COMENTARIO

Please enter your comment!
Please enter your name here