Home Hudicial Entre 2 aña y 6 luna y 3 aña di prison exigi...

Entre 2 aña y 6 luna y 3 aña di prison exigi pa grupo cu a bay asalta un DJ

224
0
SHARE
- Advertisement -

ORANJESTAD  (AAN)  – Un grupo di cinco sospechoso a presenta diabierna mainta dilanti Hues pa duna cuenta pa e delito cu nan a haci. Tur ta wordo acusa di a haci un asalto arma riba un DJ, D., riba 14 Januari 2017. Un di e sospechosonan N.B. ta bisa cu e no tin nada di haci cu esaki y no tabata sa di nada. Tres otro ta bisa cu e Colombiano D.T. a bisa nan pa bati e DJ pasobra e DJ lo a falta respet pa su chick. E Colombiano mes ta bisa cu el a wordo acerca door di un tal Hesus pa bati e DJ y el a wordo paga 750 florin. Fiscal no a kere e storia aki y a exigi entre 2 aña y 6 luna y 3 aña di prison pa e grupo aki.

E grupo ta consisti di e Colombiano D.T. biba na Aruba, e Venezolano C.R., e Venezolano J.D.(18), e Venezolano J.G. y e homber N.B. Fiscal ta acusa nan cu riba 22 di Januari 2017 nan a haci un asalto arma riba un DJ banda di Sand Bar. Ademas Fiscal ta acusa N.B. di posecion di marihuana y skin up riba 27 Maart 2016.

Hues a mustra cu e abogado di J.D., mr. Zara ta den exterior pa asunto di salud y no por ta presente. El a bisa cu e no tin nada contra pa trata e caso. E sospechoso J.D. a bisa cu e kier pa sigui. Ta asina cu J.D. a admiti tur cos.

Hues a mustra cu e homber D. a haci denuncia di asalto mientras cu e sospechosonan a bisa cu no tabata e intension di asalto sino pa bati’e.

ATRACO ARMA

Hues a bisa cu D.T. a declara na Recherche cu un tal Hesus a acerk’e pa bati un hende cu lo debe placa. Segun D.T., Hesus a ofrece 750 florin. D.T. a acerca C.R., J.D., J.G. y N.B.

Ta asina cu dia 22 Januari 2017, e grupo a bay riba persona. E persona D. a spanta y core bay. El a laga su tas di lomba cay. Polis a wordo notifica y a detene nan. Segun investigacion di Recherche, J.G., C.R. y J.D. a dicidi di haci esaki pasobra nan no tabatin placa y no tin nada di come. N.B. a bisa Hues cu e no sa net net nada di e atraco arma.

Hues a mustra cu D.T. a bisa Recherche cu el a bisa N.B. dia 22 Januari 2017 di e plan pa bay ataca y maltrata D. y N.B. a bisa cu e ta di acuerdo y a bay cu nan den auto. N.B. a bisa Hues cu esey no ta berdad.

Segun N.B. el a caba di cobra y tabata bebe y no tabata sa di nada. El a bisa cu e ta bisiña di D.T. pero no tabatin comunicacion cu e otronan. El a bisa cu e tin amistad cu D.T. pa basta tempo.

D.T. a bisa Hues cu el a wordo acerca pa maltrata D. y a bisa J.G., C.R. y J.D. pa dal e homber pero no pa bay cu nada di su pertenencia. Segun D.T., e no a haya e placa for di Hesus.

Hues a mustra cu na Recherche D.T. a declara cu el a haya un adelanto di 400 florin y na un club nocturno el a haya e 350 florin cu tabata falta. Hues a bisa cu D.T. a bisa Polis cu el a bisa N.B. kico ta bay sosode e anochi ey. D.T. a bisa cu no.

C.R. a bisa cu el a conta D.T. su situacion dificil na Venezuela y D.T. a ofrece lugar di keda. Dia di e sucedido, D.T. a lant’e for di soño y a bis’e pa bisti pa nan bay sali. El a bisa cu D.T. a bay cun’e na un lugar y a bisa cu nan ta bay bati un persona cu lo a falta respet na su amiga. Segun C.R., D.T. no a ofrece placa. El a bisa cu e intension tabata pa spanta e persona. Segun C.R. e persona a spanta y a core bay.

Hues a bisa cu for investigacion, D.T. a keda di duna C.R., J.G. y J.D. señal ora cu D. caba di traha, pa sali for di auto y ataca D. Segun C.R., ora D. a mira nan, el a core bay. El a desmenti di a saca arma y menaza D. Hues a bisa cu na Polis, C.R. a bisa cu e tabatin un boter den su man y cu J.D. tabatin algo tambe den man. J.D. a bisa cu el a sali for di auto pa bay hunto cu e otronan y a mira e homber D. core bay. J.D. a admiti di a coy e tas di lomba cu D. a benta abou. J.G. a bisa cu e intension tabata pa dal D. pero e no a sali for di auto. Segun J.G., D.T. no a ofrece ningun pago.

DROGA Y SKIN UP

Hues a bisa cu durante un control di Polis, a haya N.B. cu diferente saco di marihuana y un skin up. Esaki tabata dia 27 Maart 2016. El a admiti cu esey ta berdad.

Ta asina cu trahador social di KIA a traha raport cu C.R. durante su detencion, su yiu homber a mata su mes na Venezuela. E ta sinti’e hopi malo pa esey y e kier bay bek Venezuela. Ora Hues tabata lesa esaki den Corte, por a nota cu C.R. a cuminsa yora.

EXIGENCIA DI FISCAL

Fiscal a bisa cu e ta haya legalmente proba e asalto arma. E homber D. a bisa cu dos persona a sali for di auto, un tabatin arma y un otro cu cuchiu. Nan a exigi pa su placa. El a core bay. Fiscal a bisa Hues cu e ta sali for di punto di bista cu ta un asalto arma. Awor ta resulta cu e grupo kier a bati’e. E pregunta ta si nan tabatin plan di asalto of pa bati’e. Fiscal a mustra cu cuater di e cinco sospechosonan a bisa cu e plan tabata pa bati D.

Fiscal a bisa Hues cu e no ta kere e storia cu e intension tabata pa bati e homber D. Segun declaracion di D., nan tabata arma y ora el a benta tas abou y core bay, nan a coy su tas di lomba. E sospechosonan a admiti di tabatin un schroefdraai y un “stanley mes”. Tur esaki, na opinion di Fiscal, ta mustra cu ta un asalto arma kier a haci.

Fiscal a mustra cu tur tabata na altura di loke mester sosode e anochi ey. E ta haya cu nan ta complice di e asalto arma. N.B. ta para riba cu e no tin nada di haci cu e caso aki. D.T. a bisa cu el a bisa N.B. kico lo bay pasa e dia ey y N.B. a bay cu nan.

For di henter e investigacion Fiscal ta haya cu no por papia di arma di candela y ta declara nan liber di esaki. E ta haya cu aki por papia di un asalto arma. Esaki tabata un experencia hopi malo pa D. Fiscal a remarca cu e sospechosonan no ta para responsabel pa loke nan a haci. El a mustra cu no ta tur a bay riba homber y tin diferente funcion.

Fiscal a exigi 30 luna di prison (2 aña y 6 luna) pa C.R., J.G. y J.D. Pa D.T., Fiscal a exigi 32 luna di prison (2 aña y 8 luna) y pa N.B. el a exigi 36 luna di prison (3 aña).

DEFENSA

Abogado mr. Kock bisa cu e intension tabata pa dal D. y no maltrato severo y mucho menos asalto. D.T. no tabata envolvi den esaki. Ningun tabatin arma di candela. E ta haya cu mester mira e intension y D.T. a bisa nan pa dal D. y nada di loke Fiscal ta acusando nan. Finalmente D. no a wordo maltrata. E abogado ta haya cu mester declara D.T. liber.

Un otro abogado dama, a bisa cu C.R. a bisa cu C.R. no a maltrata D. E ta haya C.R. a wordo usa como ilegal door di D.T. y no tabata su intension pa maltrata D. E homber D. a core bay. No a haya C.R. cu arma of cuchiu.

Mr. Faarup a bisa cu J.G. no a haci nada. E tabata den auto pero no a sali. El a pidi Hues pa declara J.G. liber di asalto arma. Solamente e por wordo haya culpable pa e parti di preparacion.

Mr. Mohamed a bisa cu Fiscal ta sali for punto di bista cu N.B. tabata sa di e plan. Sinembargo si mira declaracion J.G. e ta bisa cu e ta kere cu N.B. tabata sa di e asalto arma pasobra N.B. hunto cu otronan tabata papia forma sospechoso. Con por sospecha si e tabata drumi. Despues e ta bisa cu ta un Colombiano a bin cu e plan. D.T. ta bisa cu N.B. no tabata sa mientras cu na Polis e ta bisa cu N.B. tabata sa. E abogado a conclui cu no tin suficiente indicacion cu N.B. tabata sa. Pesey el a pidi declara N.B. liber.

Hues a cera tratamento di e caso y a bisa cu e ta bay studia e caso y 15 September 2017 tin sentencia.

 

- Advertisement -

DUNA COMENTARIO

Please enter your comment!
Please enter your name here