Home Labor Expo Labor lo enfoca riba hobennan

Expo Labor lo enfoca riba hobennan

78
0
SHARE
- Advertisement -

ORANJESTAD(AAN): DPL tambe tin varios informacion riba e Expo Labor cu lo bay tuma luga. E aña aki e enfoke lo ta un poco riba e hobennan. E ta conta pa tur esnan cu ta buscando trabou e momentonan aki. DPL mes ta yuda hende busca trabou. E meta ta pa trece tur compania na un solo luga riba un solo dia.

E acceso ta mas directo pa esnan cu ta bin busca trabou. Biaha pasa e acogida tabata hopi grandi. Esaki ta un bon momento pa duna impresion na e dunador di trabou segun Richinel Stamper. E prome impresion ta importante. A invita tur esnan cu ta cliente y tur esnan cu no ta cliente.

E ta comenta cu recientemente minister di labor a anuncia cu e aña aki lo tin un biaha mas e Expo Labor, di cual ta wordo organisa pa ministerio di labor mes, conhuntamente cu e departamentonan relaciona cu labor, den e caso aki DAO, DPL tambe tin un rol crucial den e organisacion y e evento aki.

E aña aki e enfoke lo ta un tiki tambe riba e hobennan, manera ya menciona, pero en general Expo Labor ta un actividad cu ta dirigi riba tur esnan cu ta buscando un trabao na e momentonan aki, mirando cu tin diferente instancia cu ta yuda hende haya un trabao na Aruba. Un di nan ta DPL mes y tambe tin e parti di Uitzendbureau.

Tin diferente otro companianan cu ta yuda cu e parti aki. Pero e meta di e Expo Labor tabata y ta, segun Stamper, trece tur e companianan den un solo luga, riba un solo dia, caminda cu e acceso di e buscadornan di trabao ta bira hopi mas facil y directo, cu nan mes por acerca e companianan pa e parti di solicitud pa un trabao.

Aña pasa toch a haya un acogida hopi grandi y ta haci e biaha aki un biaha mas, di parti di DPL como un di e departamentonan cu ta participa na Expo Labor, pa asina ey buscadornan di trabao, cu na e momento aki kisas ta cliente di DPL of no ta cliente di DPL ainda, pa nan por acudi riba e dia aki, dia 19 di Augustus, un diasabra, for di 9’or di mainta, te cu 7’or di anochi.

Bo lo tin e ora e oportunidad pa bo por bishita Expo Labor y caminda cu lo tin diferente booth cu vacatura, trabaonan disponibel riba e mercado, na e momentonan aki, caminda cu lo bo por haci bo solicitud director y personal, of haci bo prome contacto cu e dunador di trabao.

Bo prome impresion, cual sigur lo hunga un rol importante den e decision cu e dunado di trabao, lo mester tuma riba cua candidato lo e tuma riba e vacatura, si of no. Den cuadro di esey, por duna tambe como conseho di parti di DPL pa acudi na un manera representabel y adecuadamente bisti.

E prome impresion semper ta hopi importante pa bo persona como buscado di trabao pa bo por haya un oportunidad pa wordo entrevista y/of yega asina leu di haya un trabao.

Ta recomenda tur cliente y tambe esnan cu no ta cliente di DPL, cu si ta buscando un trabao, pa acudi riba e dia aki, haci bon uso di e oportunidad. Lo bay tin tambe diferente tayer informativo y educativo cu sigur lo por yuda yega mas cerca posibel di un trabao riba nos mercado laboral, na e momentonan aki.

 

 

- Advertisement -

DUNA COMENTARIO

Please enter your comment!
Please enter your name here