Home Social EXPO Lens di mi Wowo ta celebra diez aña y lo tuma...

EXPO Lens di mi Wowo ta celebra diez aña y lo tuma lugar den Biblioteca Nacional

13
0
SHARE
- Advertisement -

Dedica na Leo Vrolijk:

ORANJESTAD (AAN) – Leo Vrolijk, a convoca un conferencia di prensa, den cual el a informa cu e exposicion tan conoci y gusta “Lens di mi Wowo” lo ta e aña aki den Biblioteca Nacional, na Madurostraat.

E apertura lo ta riba Dia di Prensa, esta 1 di September y lo keda habri te dia 14 di September.

E aña aki e expo Lens di Mi Wowo ta celebra su di dos lustro, esta diez aña consecutivo di wordo presenta.

Durante e diez añanan aki mas cu tres mil potret a wordo expone den cual mas cu 50 fotografo a participa na e exposicion aki.

Vrolijk a expresa cu e ta sumamente contento cu locual a cuminza como un chansa y a bira realidad, manera su colega Hubert Tiel mes a bise.

Awor ta bay pa diez aña caba, y den e transcurso aki e expo a tuma lugar na diferente espacio, manera Archivo Nacional, RBC den Caya, Insa Estudio di Alida Martinez.

Esnan cu a cuminza cu e expo tambe tabata Alida Martinez cu a yuda Leo hopi na inicio, na ken e ta gradici y tambe na RCB Royal Bank cu pa diez aña a tuma e proyecto cu dos man, cu e diferente directornan di e banco y aworaki cu Pierre Rafini, y semper e proyecto ta uno exitoso. E expo aki ta un di e ultimo actividadnan cu tin pa prensa awendia, compara cu antes.

Leo Vrolijk a gradici tur persona cu di un of otro manera ta yudando pa su soño bira realidad y cu despues di diez aña e por bisa cu e exposicion ta grandi y ta bon, y cu e aña aki tambe e mes ta celebra 40 aña den prensa y su diez aña di Expo e Lens di mi Wowo.

El a duna di conoce tambe cu tur e tres mil potretnan aki Archivo Nacional lo tuma nan, como parti di nan posesion cultural.

E feed back semper ta hopi bon, Vrolijk ta haya pabien y gradicimento via su facebook, y algo masha bunita ta cu muchanan ta bishita e exposicion aki.  Pesey e semper ta busca un espacio accesible na publico en general y na scolnan pa nan por bin wak e expo.

Tambe e calidad di potret cada bez ta bira mas halto. Leo a expresa cu si compara esnan di inicio cu e potretnan mas actual, por constata cu nan a drecha masha hopi mes.

Tur aña tin potret cu ta sobresali y e aña aki tin varios masha bunita mes. E comision cu a wordo lanta pa dicidi na ken e expo ta wordo dedica cada aña a dicidi cu ta na honor di Leo mes cu su 40 aña den prensa y diez aña di a bin cu e exposicion.

 

 

- Advertisement -

DUNA COMENTARIO

Please enter your comment!
Please enter your name here