Home General Hospital nobo ta bay ofrece mas espacio y privacidad pa e pashentnan

Hospital nobo ta bay ofrece mas espacio y privacidad pa e pashentnan

140
0
SHARE
- Advertisement -

ORANJESTAD   (AAN): Diamars mainta tabata tin un ‘Open House’ na edificio nobo di hospital.

Diferente hende a bishita e hospital nobo y nan a haya un tour riba algun di e pisonan di e hospital cu ta casi full cla.

Tabata tin un tour prepara tambe special pa prensa y prome cu esaki a tuma lugar, prensa a papia un rato cu Minister di Salubridad Dr. Alex Schwengle, tocante e ultimo desaroyonan rond di e edificio nobo.

Segun e mandatario, e tin contacto intensivo cu henter e grupo di hospital.

“Desde Januari bin ariba tur siman Diaranzon nos ta sinta cu tur stakeholder, pa specialmente pusha pa e proyecto bay dilanti”.

“Door cu tin biaha por tin dificultad den tumamento di decision y den ken ta carga cua responsabilidad, ami ta eynan pa pusha pa e decisionnan wordo tuma y pa ta bon cla ken ta carga cua responsabilidad”.

Esaki segun Schwengle, kende a sigui bisa cu e ta hopi contento cu desde cu e bestuur nobo bao di Ezzard Cilie a tuma e rienda over di e proyecto, e progreso den e proyecto ta mas mihor.

E mandatario a indica cu apesar cu semper lo tin varios reto, e proyecto ta uno hopi bon.

El a sigui bisa cu empleadonan di hospital a pasa den e edificio nobo pa nan mes wak den ki tipo di lugar nan ta bay traha den futuro.

“Esaki ta un inversion di pueblo pa pueblo y pesey ta bon pa pueblo mes wak kico nan ta bay haya”, segun e minister.

E mandatario a bisa tambe cu awor ta reglando y preparando tur cos cu mester wordo hasi, pa cuminza e mudamento.

E mudamento ta bay ta piso pa piso.

Segun e minister e ICU ta bay bin riba piso 5, pues eynan trabaonan di construccion ta bay cuminza dentro di poco.

E edificio nobo di berdad tabata necesario segun Schwengle, kende a bisa cu 45 aña pasa e hospital cu nos tin actualmente a wordo construi, pa un poblacion di 55 mil persona.

Awor Aruba tin alrededor di 110.000 habitante, sin conta e cantidad di persona ilegal cu ta biba riba nos isla y e turistanan cu tambe mester ricibi cuido si ta necesario.

Pesey e edificio nobo di hospital ta trece cune cu ta bay tin hopi mas espacio y privacidad pa e cliente.

Mayoria di e cambernan den hospital nobo ta bay ta cambernan di 1 persona, mientras cu algun ta bay ta camber di 2 persona.

Mirando cu Neurologia ta bay ta riba mesun piso, rehabilitacion ta bay ta hopi mihor, segun Schwengle.

 

 

- Advertisement -

DUNA COMENTARIO

Please enter your comment!
Please enter your name here