Home Gobierno Hyatt Place banda di aeropuerto lo ta completamente “berde”

Hyatt Place banda di aeropuerto lo ta completamente “berde”

37
0
SHARE
- Advertisement -

Mas di 95% di empleadonan lo ta local

ORANJESTAD    (AAN): Minister di Turismo, Transporte, Energia y Ambiente, Ing. Mike de Meza a haci un recorido na e hotel cu ta den construccion banda di aeropuerto, esta Hyatt Place. Pa September 2018 e hotel lo ta completamente cla.

E proyecto aki ta uno masha bunita di cual Gobierno tabata parti di e plan. Den pasado decisionnan mester a keda tuma pa cu e area banda di aeropuerto, di cual esaki tabata un bon escogencia. Minister de Meza lo keda haci bishita na e proyecto aki, pa asina ta na altura con tur cos lo sigui cana.

Tin hopi pasahero cu ta pasa Aruba di transito of cu ta bin pa un dia so, ta bira mas facil pa nan keda cerca di aeropuerto ora cu nan yega anochi laat y nan mester bay den oranan di mainta trempan.

Minister Mike de Meza a indica cu esaki tabata algo cu falta aki y pa cu esaki Aruba tambe lo bira un HUB. E parti bon ta cu tin e hotel aki y cerca di dje lo bay bin basta comercio. Esunnan cu lo haci uzo di esakinan lo ta e turistanan, kendenan lo keda pa un par di ora na Aruba of pa 1 dia. Lo bay tin suficiente comercio den e area aki di cual lo haci banda di aeropuerto uno atractivo. Pero tambe localnan por haci uzo di dje. Segun indica lo bay tin servicionan di banco, servicio di companianan di seguro y otro tipo di comercio cual lo ta algo sumamente bon.

E hotel aki lo bira completamente berde, pasobra tur aparatonan electrico cu lo uza, lo bay tin e clasificacion di mas halto den e industria di e sector energia. E sector aki ta label e aparatonan hopi berde di cual lo cumpli cu diferente rekisito cu por considera cu e ekiponan lo ta hopi eficiente.

Pa loke ta e parti di e hardin lo ta bunita, tambe lo tin restaurantnan y otro tipo di comercio. Esaki lo haci e area uno hopi atractivo y e ta keda cerca di e Green Corridor, Minister de Meza a expresa. E Green Corridor cu ta cuminsa desde aeropuerto te cu San Nicolas y esaki lo duna e area un otro dimension.

A inverti hopi placa den e proyecto aki di cual ta un inversion di casi 35 miyon dollar y esaki lo contribui na e economia di Aruba. E gerente di Hyatt Place a bisa Minister de Meza cu mas di 95% di e empleadonan cu lo traha eynan, ta hendenan local, esta Arubiano. Un porcentahe chikito lo ta esunnan cu lo mester yega eynan cu cierto experticio di pafo, pero no pa termino largo.

Pa cu e parti di empleadonan den construccion, a haci uzo di mayoria hende local. Mirando tur e puntonan aki, esaki ta pone cu ta bisa esaki ta tipo di proyecto cu ta desea di tin pa Aruba. Pasobra desde inicio di e proyecto y comienso di construccion por mira cu hopi hende local ta trahando den esaki.

 

- Advertisement -

DUNA COMENTARIO

Please enter your comment!
Please enter your name here