Home Cultura James Edgar Connor otro siman Diabierna ta bay wordo honra cu relief...

James Edgar Connor otro siman Diabierna ta bay wordo honra cu relief na Paseo Herencia

119
0
SHARE
- Advertisement -

ORANJESTAD  (AAN): James Edgar Connor q.e.p.d ta fundador di e legendario ‘Aruba Invaders Steel Orchestra y varios aña pasa el a haya reconocimento di Paseo Herencia 10 aña pasa, ora cu e amphitheater na Paseo a wordo yama Edgar Connor amphitheater.

Tin un plakaat special poni eynan na su honor, pero awor ta bay bin un asina yama ‘Relief’, cu su cara riba dje.

Relaciona cu esaki a tuma lugar un conferencia di prensa, unda cu e yiunan di Edgar Connor, esta Nico y Lee Connor a hiba palabra, como tambe Paula Engelen di My Voice My Creativity y Stanley Dabian di Departamento di Cultura.

Edgar Connor como teenager a cuminza experimenta cu construccion di e asina yama steel pan, usando barinan di petroleo cu a wordo benta afo.

Poco poco el a cuminza bira mihor den traha e steel pans y na dado momento no tabata ningun mihor den desaroyo di e instrumento.

Naturalmente el a toca esaki tur caminda cu hopi passion y na dado momento su nomber a bira sinonimo cu e instrumento steel pan aki na Aruba.

Hunto cu su casa Gloria Thomas Connor, kende tabata duna les di piano clasico, el a causa un impacto grandi riba e cultura musical di Aruba.

El a traspasa sa conocimento pa su yiunan Nico y Lee kendenan ta toca varios biaha pa siman tur caminda riba nos isla, mientras cu e dos yiunan homber di Lee tambe a sigui e pasonan di nan padushi, nan tata y nan omo.

Lee y Nico no solamente ta contribui na nos cultura y nos turismo door di toca tambe pa turista, sino nan ta aporta na e muchanan di nos comunidad, door di duna charla y demostracion di e arte di toca steel pan na diferente school.

Pa honra nan tata Edgar, Paseo Herencia ta bay devela e relief na e Amphitheater Diabierna otro siman dia 18 di Augustus, cuminzando 7:30 di a nochi.

Durante e evento ta bay tin presentacion di diferente artista y grupo, incluyendo ‘New Generation Steel Band’ cu ta un grupo di mucha jong cu ta toca steel pan.

‘Bito & The Boys tambe ta bay toca, como tambe Wesley y Quincy Connor.

Ta bay tin un grupo di baile cu lo balia riba musica di steel pan, mientras cu na final ‘The Connor Family’ ta bay duna un presentacion tambe, esta Nico, Lee, Angel y Eugene.

Riba e anochi ta bay duna un reconocimento tambe na tres pilar den musica di steel pan y esaki ta bay ta un sorpresa pa e personanan aki.

 

 

- Advertisement -

DUNA COMENTARIO

Please enter your comment!
Please enter your name here