KvK no ta mucho contento cu Gobierno a aumenta salario minimo

    183
    0
    SHARE
    - Advertisement -

    ORANJESTAD  (AAN): Diahuebs atardi durante un conferencia di prensa na Camara di Comercio (KvK), prensa a puntra presidente di KvK Ernst Mohamed su pensamento riba e decision reciente di Gobierno, pa aumenta e salario minimo.

    “Un cos mi tin cu bisa si ta cu nos ta un tiki desapunta, pasobra na cuminzamento di aña nos a sinta cu tur partido, cu full Gobierno y nos a bin na cierto areglonan, unda cu nos ta bay respeta  y informa otro”.

    “Di nos parti nos a mantene nos banda y nos ta sumamente disgusta y nos no ta contento con esaki a bin, sin consulta cu nos como KvK”.

    Esaki segun Mohamed, kende a sigui bisa cu e aumento di salario minimo ta nifica cu atrobe comercio tin cu bay paga pa algo cu Gobierno ta impone.

    “Bo ta bay puntra bo mes te na unda esey ta bay”, segun presidente di KvK.

    El a sigui  bisa cu KvK no ta contra di un aumento di salario minimo pasobra tur hende tin cu biba, pero bo tin cu wak ki ora bo ta impone algo asina y si e ta prudente pa hasie.

    “E problema ta cu e dunador di trabao por bisa: mas gasto pami, wel mi ta bay aumenta e prijs di mi productonan”.

    “At the end of the day bo no a bay dilanti niun tiki, pasobra ma dunabo 100 florin di aumento, pero e comerciante ta aumenta su prijsnan”, segun Mohamed.

    DIARIO a puntre presidente di KvK ki ora anto ta mihor pa aumenta e salario minimo, pasobra ta logico cu tur hende cu tin un salario minimo ta keda contento cu un aumento.

    El a splica cu ta importante pa dialoga cu e personanan cu e aumento ta bay afecta, prome cu bo impone algo asina.

    Mohamed a sigui bisa cu awor e aumenta ta bon na Augustus, siendo cu e comerciante su bukinan ta cuminza prome di Januari.

    “Pakico no hasie prome di Januari, pa asina e comerciante por ahusta su bukinan”.

    El a indica cu ta bay bin un momento cu comercio no por carga tur e peso ey.

    E presidente a bisa cu pesey ta importante pa sinta cu tur esnan envolvi y hasi algun palabracion.

    Por ehempel, e comerciante ta paga su trahadornan e aumento di salario minimo, pero di otro banda Gobierno ta suaviza algun di e impuestonan cu e comerciante tin cu paga.

    Prensa a señala si cu e hecho aumento di salario minimo por bay causa asina tanto problema segun e comerciantenan, ta muestra di e hecho cu na Aruba tin masha hopi hende ta gana salario minimo.

    Presidente di KvK tambe tabata di acuerdo cu esey riba su mes tambe ta algo preocupante, pasobra tur hende kier gana un bon salario.

     

    - Advertisement -

    DUNA COMENTARIO

    Please enter your comment!
    Please enter your name here