Home Politica Lider di MEP mester papia berdad cu pensionadonan

Lider di MEP mester papia berdad cu pensionadonan

43
0
SHARE
- Advertisement -

Lider di fraccion Marlon Sneek

No conta storianan cu e mes no ta kere aden

Si tin un partido politico cu a para pa interes di pensionadonan na Aruba, ta partido AVP caminda nos conoce cu awe e nivel di pensioen cu tin na Aruba, ta danki na e maneho hiba pa partido AVP,  e lider di fraccion di AVP, sr Marlon Sneek ta mustra.

“Durante di henter e campaña pa eleccion di 2017, nos por a scucha con politiconan di oposicion, ta trata di troce e berdad y nos tin cu bisa cu si tin un partido politico cu a para pa interes di nos pensionadonan, ta partido AVP.

E pensioen cu nos conoce awe, ta danki na e decision di gobierno di AVP pa redobla e pensioen di nos hendenan grandi y e tempo ey ora cu a puntra e actual lider di MEP, sr Oduber, e tabata contra di esaki.

MEP tabata contra pa AVP redobla e pensioen di nos grandinan y awe nos por tende e mentiranan cu ta ser treci dilanti cu entre otro Mike Eman lo a horta 61 miyon florin for di fondonan di SvB.

Ta di lamenta c’un persona cu ta pretende di bay bira e siguiente Prome Minister di nos pais,  ta expresa su mes di e forma aki, bisando cu ‘el a horta’, ‘el a coy,’ ‘ el a ranca,’ trece cosnan negativo pa comunidad y ta algo cu nos ta condena totalmente pasobra na luga di trece cosnan positivo dilanti, caminda nos despues di ocho aña di negativismo di MEP, awor den campaña, tambe nan ta keda riba mesun liña negativo aki.

Si nos mira e situacion di nos pensionadonan, nos a pasa un ley den Parlamento caminda nos a duna un ‘reparatietoeslag’ caminda e nomber caba ta bisa contenido di e ley aki, caminda nos a mira cu mester a duna e pensionado  algo extra.

Tempo cu MEP a introduci e BBO, e pensionado no tabata paga belasting y kico a pasa, ora cu a cambia e tabelnan di inkomstenbelasting, e no a conta pa e pensionado y esaki a pone cu e decision di MEP a dal e pensionado tur cu tin  y pesey nos a bin cu e ‘reparatietoeslag’ pa percura cu e pensionado ta haya un compensacion pa e por haya loke e tin mester.

Un gobierno cu ta traha cu vision ta tene cuenta kico tin y kico ta bay tin y pesey den Parlamento nos a pasa e ley di pensioen general y awe ora nos mira riba e lista di MEP, politiconan di MEP ta papia di n lista di medida caminda nan ta coy e ley di pensioen general, pone bou di medida.

Un logra grandi asina pa tur hende na Aruba por tin un otro pensioen banda di esun di SvB, un logra caminda doño di trabou ta inverti 3% den e fondo ey pa un trahado y caminda e trahado hunto cu su doño di trabou, ta spaar otro 3% anto partido MEP kier bisa cu esaki ta un medida contra pueblo.

Un hende cu ta prepara pa futuro, cu ta prepara pa dia cu e baha cu pensioen e tin algo pa cobra, anto politiconan di MEP kier yama esaki medida, ta algo cu nos ta lamenta profundamente e tipo di expresionnan aki di parti di MEP,  caminda nan ta purba di no duna pueblo e informacion corecto.

Corda bon, lider di MEP, Evelyne Wever Croes, tabata Inspector di Belasting, pues e sa bon di e cifranan aki, y nos por corda con un colega di dje den e departamento ey, tabata yama e lider di MEP ‘1 April’ y ya tur hende sa kico esey kiermen, cu e ta un persona cu ta gusta troce e berdad.

Evelyne como inspector di impuesto, entre otro a pone su firma bou di un documento den cual e ta conseha Gobierno di MEP, pa hisa e edad di pensioen y den e carta el a informa Gobierno di MEP, cu su persona mes lo traha riba e ley aki pa hisa edad di pensioen pero nos por a tuma nota cu esaki no a tuma luga. Aworaki e ta papia cu pensionadonan cu e lo bay kita belasting pa nan.

AVP a pasa un ‘ouderaftrek’ den Parlamento y pesey ta importante pa nos pueblo ta na altura cu nos a traha riba e ‘ouderaftrek,’  nos a traha riba e pensioen general, nos a atende ultimamente cu e aumento cu tabatin relaciona cu indexering cu entrada di pensionadonan  caminda e cifra aki lo bay subi.

Nos a atende cu e reparatietoeslag, pues un Parlamento dinamico cu hunto cu su gobierno, a percura pa mantene e poder di compra di nos grandinan. Ora cu nos ta papia di ouderaftrek, e ta un suma cu e pensionado por uza como un ‘aftrekpost’ pa evita cu si e ta un pensionado cu ta cobra SvB, esta pensioen di AOV so, e no ta paga belasting.

Awe nos por scucha Evelyne bisa cu ora MEP drenta gobierno, nan ta bay pone cu pensionadonan no ta paga belasting, loke ya ta un hecho caba introduci pa Gobierno di AVP y ora cu nos a bin cu e ouderaftrek, esaki ta evita cora tin e reparatietoeslag, ora cu tin un aumento den pensioen, cu ta pone cu e pensioen ta subi y caminda e pensionado lo por bay cay den e bracket pa paga belasting, pa elimina esaki nos a introduci un ouderaftrek, loke kiermen cu e ouderaftrek aki, e persona no ta haye ta paga belasting como pensionado cu ta cobra un pensioen di AOV.

Claro cu si e persona tin un pensioen banda di esaki di ambtenaar caminda e persona ta subi na un suma hopi mas halto, of e pensionado tin dies apartamento ta huur cu ta duna e persona un entrada hopi mas halto, e ta cay e ora den e grupo di un hende cu tin bon entrada y e ora e persona ta yega na paga belasting,” Parlamentario Marlon Sneek ta mustra.

- Advertisement -

DUNA COMENTARIO

Please enter your comment!
Please enter your name here