Mr. Chris Lejuez a declara cu hendenan a paga e minister pa haya ontheffing

    2258
    0
    SHARE
    - Advertisement -

    Acusacionnan fuerte den direccion di Minister Paul Croes

    ORANJESTAD    (AAN): Un di e topiconan cu ta circula den e ultimo oranan Aruba ta e declaracionnan publica den e portal social di noticia esta, Noticia Cla di mr. Chris Lejuez unda e haci declaracionnan fuerte den direccion di minister Paul Croes.

    Redaccion di DIARIO a haya varios yamada comentando riba e echo aki cu ta lanta mas stof ainda di loke ya caba tabatin, specialmente pa gobierno di AVP cu keto bay ta bisa cu Paul Croes ta keda como minister sin cartera y lo sigui cobra su salario.

    Segun e articulo di Noticia Cla, abogado Lejuez a declara cu tin informacionnan riba mesa cu ta incrimina Croes pa loke e ta wordo acusa di dje.

    Un parti hopi pisa ta esun cu ta bisa cu tin hendenan cu a incrimina nan mes bisando cu nan a paga Paul pa haya e ontheffing y cu hasta e mes a laga sa cuanto placa mester wordo paga.

    Segun e strafdossier cu e medio di comunicacion online ta menciona, ta ser papia cu e suma lo tabata di 2.500 florin pa su firma, aunke tin biaha e tabata mas y tin biaha e no tabata cobra mes, pero echo ta keda cu ta trata di hopi placa.

    Lejuez lo a declara tambe cu e no por bisa cu ta trata di 2000 ontheffing, pero e ta sigur cu ta mas cu 1000. Si calcula e mil aki na 2500 florin pa firma, e ora ta papiando di un suma di 2.5 miyon florin cu e minister lo a haya den su saco pa djis pone su firma riba documento cu ta permiti stranheronan bin traha na Aruba, limitando e cantidad di trabou pa nos mesun yiunan di tera.

    Despues di e declaracionnan di Lejuez den Noticia Cla, famianan di Paul Croes a saca un reaccion bisando cu loke e abogado a bisa no ta corecto, cu e ta sintando riba stul di fiscal of hues. A ser bisa cu e declaracionnan di Lejuez lo tin un tinte politico mirando cu su sobrina ta un candidata riba lista di MEP, pero den e caso aki lo ta bon pa nan bay bati na porta di Premier Eman y no wak den direccion di MEP.

    Por ta nan a lubida e vinculo hopi cerca y estrecho cu tin cu AVP y en especial cu Premier Eman ya cu ta hustamente yiunan di e abogado aki ta e preti wowo di nos Minister President. Ta nan a haya un contract cu terugwerkende kracht pa 27 mil florin pa luna pa hiba un campaña riba social media, ta nan a haya un contract di logo di I Love Aruba for di e propio gobierno y ta nan a haya un sponsorship di casi 400 mil florin pa un festival di musica.

    Apart di politica, Chris Lejuez ta un di e abogadonan mas respeta y cu un trayectoria impresionante na Aruba y durante tur e añanan cu e ta eherciendo su profesion, semper el a demostra di ta un persona cu ta bay al caso y no ta presenta insinuacionnan.

    Cu esaki kier bisa cu loke el a declara mester wordo tuma na cuenta, specialmente pa e gobierno na mando. No por ta asina cu nan ta sigui mantene un persona cu no solamente ta sospechoso, pero tambe deteni y cu acusacionnan hopi pisa contra dje, como minister na unda nos pueblo pagado di belasting ta sigui paga su salario.

    Ademas dañando nomber di Aruba na nivel internacional, un nomber cu a costa hopi aña pa drecha y cu pa e malcriades di algun gobernante por wordo destroza.

    - Advertisement -

    DUNA COMENTARIO

    Please enter your comment!
    Please enter your name here